अफ्रिकन नागरिकलाई नेपाल प्रवेशमा रोक

काठमाडौँ । कोरोना भाइरसको नयाँ भेरियन्ट भेटेपछि अफ्रिकन महादेशका नागरिकलाई नेपाल प्रवेशमा रोक लगाउने निर्णय गरिएको छ ।

आइतवार गृह मन्त्रालयले कोभिड–१९ को नयाँ भेरियन्ट ‘ओमिक्रोन’को जोखिमका कारण अफ्रिकाका नागरिकलाई नेपाल प्रवेशमा रोक लगाउने निर्णय गरेको अध्यागमन विभागका प्रमुख नारायणप्रसाद भट्टराईले बताए ।

दक्षिण अफ्रिकामा कोरोनाको नयाँ भेरियन्ट ‘ओमिक्रोन’ भेटिएको छ । आइतबार कोभिड–१९ संकट व्यवस्थापन समन्वय समितीको बैठकमा सो भेरियन्टको रोकथामको लागि छलफल समेत भएको छ ।

अफ्रिकाबाट आउने नेपाली पासपोर्ट बाहक र डिप्लोम्याटहरुलाई स्वास्थ्य मापदण्डअनुसार होटल क्वारेन्टाइनमा राख्ने निर्णय गरिएको छ ।

हवाई मार्ग बाहेक अफ्रिकन मुलका नागरिकलाई स्थलमार्गबाट समेत प्रवेशमा रोक लगाउन सर्कुलर गरिएको अध्यागमन विभागका महानिर्देशक भट्टराईले बताए ।