काठमाडौं । बर्दिबासका कर्मचारीहरु डा. सिके राउत नेतृत्वको जनमत पार्टीको विरोधमा प्रदर्शन गरेका छन् ।
खानेपानी तथा ढल निकास आयोजनाको कार्यालय जनकपुरका निमित्त आयोजना प्रमुख इन्जिनियर राजेश्वर कुशवाहालाई अमानवीय ब्यबहार गरेको विरुद्ध जनमत पार्टी विरुद्ध बर्दिबासका कर्मचारी हातहातमा कालो पट्टी बाँधेर सडकमा आइतबार प्रदर्शन गरेका हुन् ।
‘राष्ट्रसेवक कर्मचारीमाथि आक्रमण बन्द गर, जनकपुर घटनाका दोषीलाई कारवाही गरु, राष्ट्रसेवक कर्मचारीको मानव अधिकार सुनिश्चित गर, कथित जनतामारा जनमत पार्टीलाई प्रतिबन्ध गरु, जनताको करले बनाएको कार्यालय तिमीले जलायौं–तिमीजस्ता देशद्रोही नेताले कर्मचारी विद्रोही बनायौुं जस्ता नारा लेखिएको प्लेकार्ड बोकेरसहित कर्मचारीहरु सडकमा उत्रेका थिए ।
सयौंको संख्यामा रहेका कर्मचारीले जनमत पार्टीविरुद्ध चर्को नाराबाजी गर्दै बर्दिवासको विभिन्न भागमा प्रदर्शन गरेका हुन् ।
कोणसभामा परिणत जुलुसमा कर्मचारीहरुले निमित प्रमुख कुशवाहामाथि भएको अमानवीय व्यबहार घटनाका संलग्न दोषीलाई कडाभन्दा कडा कारबाहीको माग गरेका छन् । दोषीलाई कारबाही नभएसम्म आनदोलन जारी रहने उनीहरुले चेतावनी दिएका छन् ।
कर्मचारीहरुले ईलाका प्रहरी कार्यालय बर्दिवास मार्फत महोत्तरीका प्रमुख जिल्ला अधिकारीलाई ज्ञापनपत्र समेत बुझाएका छन्।
देश र जनताको सेवा प्रवाहमा खटिएका राष्ट्रसेवक कर्मचारीमाथि भएको नृशंस र अक्षम्य अपाराधिक कुकर्म संविधानत नागरिकको मौलिक हकको हनन तथा मानव अधिकारको उल्लंघन समेत भएकोले यस्तो अराजक घटनामा संलग्न व्यक्तिलाई तत्काल गिरफतार गरी कडाभन्दा कडा कारवाही गर्न ज्ञापन पत्र मार्फत माग गरेका छन् ।
