काठमाडौं । पाकिस्तानका परमाणु वैज्ञानिक डा.अब्दुल कादिर खानको ८५ वर्षको उमेरमा निधन भएको छ ।
पाकिस्तानका रक्षामन्त्री परवेज खट्टकले ट्विटमार्फत उनको निधन भएको जानकारी दिँदै पाकिस्तानका लागि ठूलो क्षति भएको बताएका छन् ।
उनले ट्विटरमा लेखेका छन्, ‘डा.खानले मुलुकका लागि जुन सेवा गरेका छन्, त्यो सधैं सम्मान रहनेछ । पाकिस्तानको रक्षा क्षमता बढाउनमा उनको योगदानको सधैं ऋणी रहनेछौं।’
स्वास्थ्यमा समस्या आएपछि उनी एक स्थानीय अस्पतालमा भर्ना भएका थिए ।
पाकिस्तानका प्रधानमन्त्री इमरान खानले परमाणु वैज्ञानिक खानको निधनमा गहिरो शोक व्यक्त गरेका छन् ।
आफ्नो ट्विटमा इमरानले लेखेका छन्, ‘डा.अब्दुल कादिर खानको निधन धेरै दुःखद हो । मुलुकलाई धेरै माया गर्ने उनको देशलाई परमाणु शक्ति सम्पन्न बनाउनमा महत्त्वपूर्ण भूमिका थियो । यसबाट पाकिस्तानलाई आक्रामक परमाणु शक्ति सम्पन्न छिमेकीबाट सुरक्षा प्राप्त भयो । पाकिस्तानीका लागि उनी राष्ट्रिय प्रेरक थिए ।’
पाकिस्तानका सूचना एवं प्रसारणमन्त्री चौधरी फवाद हुसैनले पनि ट्विट गर्दै खानको निधनमा दुःख व्यक्त गरेका छन् ।
