काठमाडौं । ब्राजिल, रुस, भारत, चीन र दक्षिण अफ्रिका सहितका देशहरू सम्मिलित ब्रिक्स समूहले इरान विरुद्ध भइरहेको सैन्य आक्रमणप्रति गम्भीर चिन्ता व्यक्त गरेको छ।
ब्रिक्सले हालै संयुक्त विज्ञप्ति जारी गर्दै जुन १३ देखि इरानमाथि भइरहेको आक्रमणलाई अन्तर्राष्ट्रिय कानून र संयुक्त राष्ट्रसंघको बडापत्रको उल्लङ्घन भएको जनाएको छ। विज्ञप्तिमा भनिएको छ, “हामी इरानमाथिको सैन्य आक्रमणप्रति गम्भीर चिन्ता व्यक्त गर्दछौं र सबै पक्षहरूलाई संवाद र कूटनीतिक माध्यमबाट समस्याको समाधान गर्न आह्वान गर्दछौं।”
समूहले विशेषगरी “शान्तिपूर्ण आणविक प्रतिष्ठानहरू” विरुद्ध गरिएका आक्रमणलाई अन्तर्राष्ट्रिय नियमहरूको स्पष्ट उल्लङ्घन भन्दै निन्दा गरेको छ।
ब्रिक्सको यो बयान त्यस्तो समयमा आएको हो जब हालै भारतले इरानमाथिको आक्रमणको लागि इजरायलको आलोचना गरिएको सांघाई सहयोग संगठन (एससीओ) को विज्ञप्तिबाट आफूलाई टाढा राखेको थियो। तर भारतले भने ब्रिक्स समूहको यो विज्ञप्तिबाट भने आफूलाई अलग राखेको छैन।
हाल ब्रिक्स समूहमा ब्राजिल, रुस, भारत, चीन र दक्षिण अफ्रिकासहित साउदी अरेबिया, इजिप्ट, इथियोपिया, इरान, संयुक्त अरब इमिरेट्स र इन्डोनेसियासमेत सामेल भइसकेका छन्। समूहले भविष्यमा यस्ता आक्रमणबाट उत्पन्न हुने सम्भावित मानविय संकटप्रति पनि गहिरो चासो व्यक्त गरेको छ।
