काठमाडौं । इरानको आणविक कार्यक्रममाथि अमेरिकी आक्रमणपछि रुसले अन्तर्राष्ट्रिय आणविक ऊर्जा एजेन्सी (आइएइए) सँगको सहकार्य अन्त्य गर्ने घोषणा गरेको छ।
रुसी राष्ट्रपति भवनका प्रवक्ता दिमित्री पेस्कोभले बुधबार पत्रकार सम्मेलनमार्फत सो जानकारी दिएका हुन्। उनले भने, “यो निर्णय इरानको आणविक स्थलहरूमा बिना उक्साहट गरिएको आक्रमणको परिणाम हो।”
पेस्कोभले आइएइएको विश्वसनीयता र निष्पक्षतामा गम्भीर क्षति पुगेको उल्लेख गर्दै वर्तमान परिस्थिति चिन्ताजनक भएको बताए। उनले थपे, “आइएइएजस्तो अन्तर्राष्ट्रिय संस्थाले तटस्थता कायम गर्न नसक्नु दुर्भाग्यपूर्ण हो।”
रुसलाई इरानको रणनीतिक सहयोगीका रूपमा हेरिँदै आएको छ। रुसले हालै इरानमाथि भएका अमेरिकी आक्रमणहरूको पनि कडा शब्दमा निन्दा गरेको छ।
यद्यपि यसअघि यसै हप्ताको सुरुवातमा प्रवक्ता पेस्कोभले इरानमाथिको आक्रमणले अमेरिका–रुस द्विपक्षीय सम्बन्धमा प्रत्यक्ष असर नपर्ने स्पष्ट पारेका थिए।
प्रमुख अन्तर्राष्ट्रिय विश्लेषकहरूले भने यो घटनाले आणविक निगरानी र क्षेत्रीय स्थिरतामा दीर्घकालीन असर पार्ने संकेत गरेका छन्।
