काठमाडौं । हिन्दुवादी पार्टी राप्रपाले धर्म परिवर्तनको चर्को विरोध गर्दै आएको छ । सनातन हिन्दु राष्ट्रको पक्षमा वकालत गर्दै आएको पार्टीले मंसिर ४ को निर्वाचनअघि सार्वजनिक गरेको घोषणापत्रमा ‘योजनाबद्ध धर्म परिवर्तनलाई नियन्त्रण र निरुत्साहित गरिने’ उल्लेख गरिएको छ ।
यतिमात्रै होइन मठ मन्दिर, गुम्बा, मस्जिद, माङ्गहिम जस्ता धार्मिक संघसंस्थाहरुको विकास र संरक्षण गर्ने भनिएको छ । यस्तै क्रिश्चियन मेसिनरीहरुले कारण निरन्तर हिन्दु धर्म खुम्चिने क्रममा रहेको र धर्म परिवर्तन गराइने क्रम बढ्दो क्रममा रहेको भन्दै पार्टीले निरन्तर आवाज उठाउँदै आएको छ ।
तर, सोही पार्टीले एक ‘क्रिश्चियन प्रचारक’ लाई प्रतिनिधिसभामा समानुपातिक सांसद बनाएपछि पार्टीभित्र असन्तुष्टि सुनिन थालेको छ । राप्रपाले धादिङकी बिना लामालाई जनजाती कोटाबाट समानुपातिक सांसद बनाएपछि पार्टीभित्र असन्तुष्टि सुनिन थालेको हो । यसबारे पार्टी बाहिर पनि विभिन्न टीकाटिप्पणी भइरहेका छन् ।
केही नेताहरुले अध्यक्ष राजेन्द्र लिङ्देनले पार्टीभित्रै छलफलै नगरी बिनालाई समानुपातिक सांसद बनाएको आरोप लगाएका छन् । ‘हिन्दुवादी पार्टीमा क्रिश्चियन मेसिनरीको प्रवेश शोभनीय भएन । सुरुमा त हामीले निर्वाचन आयोगमा नाम गएको पनि थाहा पाएनौँ । आयोगले बन्दसूची सार्वजनिक गरेपछि मात्रै थाहा भयो । अहिले धर्म परिवर्तनमा सक्रिय क्रिष्चियन पास्टरलाई सांसद बनाउने काम भयो’, राप्रपाका एक नेताले बताए । बिना अघिल्लो स्थानीय तह निर्वाचनमा धादिङको रुबिभ्याली गाउँपालिकामा राप्रपाबाट उपाध्यक्ष थिइन् ।
यसैबीच बिनालाई समानुपातिक सांसद बनाएको विषयमा पार्टीभित्र र बाहिर समेत टीकाटिप्पणी बढेपछि केही नेता भने बचाउमा उत्रिएका छन् । यसमध्येका एक प्रवक्ता मोहन श्रेष्ठले विभिन्न ९ बुँदामा पार्टीको तर्फबाट धारणा राख्दै बिनाको समानुपातिक यात्राको बचाउ गरेका छन् । श्रेष्ठले बिना हिन्दु राष्ट्रका लागि एक दशकदेखि संघर्षरत रहेको दाबी गर्दै उनी हिन्दु राष्ट्रकै एजेन्डा लिएर ०७४ मा धादिङको रुबीभ्याली गाउँपालिकाको उपाध्यक्षमा विजयी भएको उल्लेख गरेका छन् । कपिलवस्तुटाईम्स
