ओलीविरुद्धको गठबन्धनमा सत्ताधारी दलको सफलता

कांग्रेसकै नेतृत्वमा सरकार बन्दा माओवादी, नेकपा एकीकृत समाजवादी, जसपा, लोसपा, जनमत पार्टी र नागरिक उन्मुक्त पार्टी मिलेमा सहजै सत्ता गठबन्धनकै सरकार बन्ने देखिन्छ । एमालेसँग चुनावी सहकार्य गरेको जसपाले धोका भएको भन्दै सत्ता गठबन्धनसँगै सरकारमा जाने संकेत दिएको छ ।

सत्ता स्वार्थ मिलेको खण्डमा राप्रपा पनि सरकारमा आउने सम्भावना छ । त्यो सम्भावनाले एमालेविरुद्धको गठबन्धनलाई अर्को बल मिल्ने देखिन्छ । कांग्रेस, माओवादी, समाजवादी मिलेर चुनावमा जाँदा पनि एमालेले लोकप्रिय मत ल्याउँदा अब पाँच वर्ष नै ओलीविरुद्धको गठबन्धन जाने देखिन्छ ।

सोमबार बालुवाटारमा बसेको सत्ता गठबन्धनको बैठकले चुनावमा सफलता हात लागेको भन्दै विज्ञप्ति जारी गरेका छन् । संसद् विघटनविरुद्ध एक भएका दलहरूले चुनावसम्मै कम्तीमा पाँच वर्ष सरकार चलाउने गरि औसत बहुमत पाउनुलाई संविधानको रक्षाका रुपमा उनीहरुले बुझेका छन् ।

यसलाई दिगो रुपमा लैजाने उनीहरूको योजना छ । तर सत्ता गठबन्धनका नेताहरुले सफलता उत्सव मनाउँदा चुनौति र चस्का धेरै छन् । यसपटक गगन थापाको चर्को स्वरजसरी रवि लामिछाने पार्टीको उदय भएको छ ।

रवि लामिछाने तिनै व्यक्ति हुन्, जसले चर्को स्वर गरेर नेताहरूलाई गाली गर्दै जनताको माग सम्बोधन गर्न विभिन्न निकायसँग लबी गर्थे । दलका नेताहरुबाट आजित भएका जनताको मन जित्दै रविले यसपटकको चुनावमा आफ्नो पार्टीका लागि प्रत्यक्षमा ७ सिट जितेका छन् ।

समानुपातिकमा माओवादीकै हैसियतमा रहेको रवि पार्टीले यसपटक प्रतिनिधिसभामा कम्तीमा २० सिटजति पाउने सम्भावना छ । यो उसका लागि निकै ठूलो शक्ति हो । पार्टी गठन गरेको ६ महिनामै चुनाव जितेर संसद्को चौथो ठूलो दल बन्नु आफैँमा ठूलो सफलता हो ।

त्यसतर्फ ध्यान नदिएका नेताहरूलाई भोलिका दिनमा जनताको माग सम्बोधन गर्न नसकेमा झन् ठूलो चुनौति आइलाग्ने निश्चित जस्तै छ । त्यसतर्फ समयमै ध्यान दिएर ठूला पार्टीका ठूला नेताहरूले साना साना कुरा नसुधार्ने हो भने गठबन्धन सफल हुने नभई आउँदो चुनावमा युवाहरूकै वर्चश्व संसद्मा हुने निश्चित जस्तै छ ।