विराटनगर : पित्तथैलीमा भएको पत्थरीको शल्यक्रिया गर्नका लागि विराटनगरको नोबेल शिक्षण अस्पतालमा भर्ना भएकी एक वृद्ध महिलाको कोरोना संक्रमणका कारण मृत्यु भएको छ।
मोरङको बेलबारी नगरपालिका–७ बाहुनीकी ६४ वर्षीया महिलाको शल्यक्रिया गर्न नपाइकन ज्यान गएको हो।
महिलालाई शल्यक्रियाका लागि भदौ २८ गते अस्पतालमा भर्ना गरिएको थियो। स्वास्थ्यमा समस्या थपिँदै गएपछि आईसीयूमा भर्ना गरेर उपचार थालिएकी उनको मंगलबारराति १० बजे मृत्यु भएको अस्पतालका जनसम्पर्क अधिकृत नारायण दाहालले जानकारी दिए। २८ गते नै स्वाब संकलन गरेर पीसीआर परीक्षण गर्न पठाइएकोमा मंगलबार साँझ रिपोर्ट पोजेटिभ आएको र थप उपचारका लागि कोभिड अस्पताल पठाउने तयारी हुँदै गर्दा मृत्यु भएको उनको भनाइ छ।
‘कुनै बिरामीको शल्यक्रिया गर्नुअघि कोरोना भए/नभएको पुष्टि गर्न पीसीआर परीक्षण गराइन्छ,’ दाहालले भने, ‘तर रिपोर्ट पोजेटिभ आएको चार घण्टा नबित्दै महिलाको मृत्यु भयो।’ उनले कोरोना रिपोर्ट पोजेटिभ आएका बिरामीको शल्यक्रिया गर्न अस्पतालले नसक्ने पनि बताए।
मृतकको पित्तथैलीमा भएको पत्थरीको शल्यक्रिया गर्ने समय तालिका बुधबारलाई तोकिएको थियो। तर त्यसअघि नै कोरोना संक्रमणका कारण महिलाको मृत्यु भएको जानकारी दाहालले दिए। मृतकमा अत्याधिक पेट दुख्ने र श्वासप्रश्वासको समस्या रहेको पाइएपछि अस्पतालले पीसीआर परीक्षणका लागि स्वाब संकलन गरेको उनको भनाइ छ।
राई थरकी महिलाको मृत्यु भएसँगै बेलबारी नगरपालिकामा कोरोना संक्रमणका कारण मृत्यु हुनेको संख्या दुई पुगेको छ। यस अघि बेलबारी– ५ की महिलाको मृत्यु भएको थियो। प्रदेश १ मा हालसम्म ज्यान गुमाउने संक्रमितको संख्या ५२ पुगेको छ। annapurnapost
