काठमाडौं – नेपाली कांग्रेस, माओवादी केन्द्र, एकीकृत समाजवादी, जसपा, राजमो मिलेर चुनावमा जाने निर्णयप्रति मुर्मुरिएको एमाले पनि भुरेटाकुरे दलसँग सहकार्य गर्ने मनस्थितिमा पुगेको छ ।
जति गर्दा पनि माओवादी र एकीकृत समाजवादीलाई आफूतिर तान्न नसकेपछि एमाले अध्यक्ष केपी ओलीले सिके राउत, कमल थापा, रेशम चौधरी, राजेन्द्र लिङ्देनलाई बोकेर चुनावमा जाने रणनीति अख्तियार गरेको नेताहरू बताउँछन् ।
स–साना दललाई बोकेर जाँदा समानुपातिक मत बढ्न सक्ने एमालेको अनुमान छ । प्रत्यक्षतर्फ कम सीट जितिए पनि पनि समानुपातिकतर्फबाट सबैभन्दा धेरै मत ल्याउने रणनीतिमा ओली लागेका छन् ।
एकीकृत समाजवादीका कारण काटिने भोट अन्यत्रबाट भर्पाइ गर्ने र केही थप पनि गर्ने रणनीतिमा रहेका कारण एमालेले साना पार्टीलाई साथ लिन खोजेको देखिएको छ । कैलाली, बर्दिया, बाँके, दाङलगायत तराईका केही थारु बाहुल्य क्षेत्रमा रेशम चौधरीको पनि प्रभाव रहेको छ । सिके राउतको जनमत पार्टी, कमल थापाको राप्रपा नेपाल तथा राजेन्द्र लिङ्देनको राप्रपासँग एमालेले सहकार्य गर्न सक्ने देखिएको छ ।
स्रोतका अनुसार सीके राउतसँग मिलेर सप्तरी २ मा राउतलाई सहयोग गर्ने तयारी भइरहेको छ । उपेन्द्र यादवको यो क्षेत्रमा एमालेको साथमा राउत चुनाव लड्ने सोचमा छन् र एमाले पनि यो क्षेत्रमा आफू नजितिने भएका कारण राउतलाई समर्थन गर्न सक्ने बताइएको छ । राजेन्द्र लिङ्देनको राप्रपा अन्तिममा एमालेसँग मिल्न सक्ने बताइएको छ ।
झापा, बाँके, हेटौडालगायतका क्षेत्रमा राप्रपासँग मिल्नुपर्ने बाध्यताका कारण एमाले पनि उनीहरुसँग नजिकिने प्रयासमा रहेको छ । यसअघि राप्रपासँग मिलेकै कारण ओलीले झापा ५ मा चुनाव जितेका थिए ।
यदि माओवादी र राप्रपासँग नमिलेको भए ओलीलाई चुनाव जित्न निकै कठिन हुने थियो । अहिले माओवादी अर्कै गठबन्धनमा छ । एमाले आफैं विभाजन भएको छ । राप्रपा पनि के गर्ने भन्ने निर्णयमा पुगिसकेको छैन ।
