काठमाडौं । वाम समाजवादी मोर्चा बनाउने प्रयासमा रहेका तीन दलबीच बिहीबार पनि छलफल भएको छ ।
पाँचदलीय गठबन्धनमा रहेका नेकपा माओवादी केन्द्र, नेकपा एकीकृत समाजवादी, जनता समाजवादी पार्टी (जसपा) तेस्रो मोर्चा बनाउने प्रयासमा छन् ।
बिहीबार पनि तीन दलका शीर्ष नेताहरुबीच छलफल भएको थियो । ‘वाम समाजवादी मोर्चा बनाउने र नेपाली कांग्रेससँग तालमेल गरेर जाने गरी गठबन्धनलाई सक्रिय बनाउने समझदारी भएको छ,’ छलफलमा सहभागी एक नेताले भने ।
माओवादी केन्द्रका अध्यक्ष पुष्पकमल दाहाल प्रचण्डले मोर्चा बनाउन नयाँ पार्टी गठनको प्रक्रियामा रहेका डा. बाबुराम भट्टराई र नेकपा एकता अभियानका संयोजक वामदेव गौतमसँग पनि छलफल गरेका थिए । तर बिहीबारको बैठकमा दुबै नेतालाई बोलाइएको थिएन । छलफलमा सहभागी एकीकृत समाजवादीका एक भन्छन्, नेकपाकालीन तत्कालीन सचिवालयका सदस्यहरु बस्दा सामान्य छलफल भएको हो । त्यसबाहेक अरु कुराकानी भएको छैन ।’
उनका अनुसार अहिलेसम्म पाँचदलीय गठबन्धनमा आवद्ध राष्ट्रिय जनमोर्चालाई मोर्चामा समावेश गर्ने र आगामी चुनावमा कांग्रेससँग तालमेल गर्ने योजना छ ।
बिहीबार पार्टी कार्यालय, पेरिसडाँडामा बसेको स्थायी समितिको बैठकमा पनि माओवादी केन्द्रका अध्यक्ष पुष्पकमल दाहाल प्रचण्डले मोर्चा बनाउन भइरहेको प्रयासबारे ब्रिफिङ गरेका थिए ।
‘कांग्रेससँग नै सहकार्य गर्ने हो, अब दायाँ–बायाँ सोच्नुहुन्न,’ प्रचण्डको भनाइ उधृत गर्दै माओवादी स्थायी समिति सदस्य हरिबोल गजुरेलले भने, ‘गठबन्धनभित्र वामपन्थीहरुको एउटा मोर्चा त बन्छ, तर, पार्टी एकता संयोजन समिति बन्छ कि बन्दैन अझैं टुंगिएको छैन ।’
