काठमाडौं । एमाले अध्यक्ष केपी शर्मा ओलीले धार्मिक गतिविधि अगाडि बढाएपछि सबैतिरबाट प्रहार भयो । पार्टीभित्रैबाट प्रहार हुँदा उनले संसद विघटन गरेर नयाँ जनादेशमा जान खोजे ।
विघटन गरेकै बेला पूर्व प्रधानन्यायाधीशहरुले पनि विरोध जनाए । खासगरी न्यायालयमा पश्चिममा फण्ड भित्र्याउने कल्याण श्रेष्ठहरु, पश्चिममासँग बढी अट्याचमेन्ट हुने मानवअधिकार आयोगको प्रमुख आयुक्त भइसकेका अनुपराज शर्माहरु आक्रामक देखिए । उनीहरुले अघोषित रुपमा न्यायालयलाई नै दबाबमा राखे । यो अभियानमा सुशीला कार्की, मिनबहादुर रायमाझी पनि साथमा रहे ।
ओलीले दुईपटक नै विघटन गर्दा संविधानको रक्षा नाम दिएर पूर्वप्रधानन्यायाधीशहरुले वक्तव्य बाजी गरेर न्यायालयलाई नै दबाबमा राखे । बदर गर्न बाध्य पारे । ओलीलाई सत्ताबाट हटाउन भूमिका खेले । पश्चिममा निकट मानिने पूर्वन्यायाधीशहरु अहिले ओलीसँग डराइरहेको उनीहरुको अभिव्यक्तिले देखिन्छ ।
ओलीले २०६३ सालमा परिवर्तनमा नाममा भएको जनभावना विपरीतका काम धर्मनिरपेक्षता संघीयतामा जनमत संग्रह गराउने, सनातन धर्मको रक्षा गर्ने छाँटकाँट देखाएपछि सबैले प्रतिगमन भनेर विरोधमा उत्रेका थिए । सत्ताबाट हटेपछि पनि ओली क्रेज घटेको छैन । उनी आफ्नो एजेण्डामा तटस्थ छन् । त्यसमाथि प्रधानमन्त्री शेरबहादुर देउवा पनि धार्मिक गतिविधिमा सक्रिय भएपछि माहोल अघि बढेको छ ।
यस्तोमा पूर्वप्रधानन्यायाधीशहरुले हालै ओली र देउवालाई लक्षित गरि फेरि खोकेका छन् । पूर्वप्रधानन्यायाधीश कल्याण श्रेष्ठले सरकार र राजनीतिक दललाई संविधानभित्र बाँधिने संस्कार तथा संस्कृति होस् भन्ने जनताको चाहनालाई सम्मान गर्नुपर्ने बताए । जबकी संविधान नै जनभावना विपरीत बनेको तथ्यसँग उनी राम्रोसँग जानकार छन् ।
नेपाल कानुन समाज र संविधान निगरानी समूहको कार्यक्रममा श्रेष्ठले प्रमुख राजनीतिक दलका नेतृत्व सत्ता र शक्तिको प्रतिस्पर्धामा रहेका बेला अरु सांसदले सदन जोगाउने तथा रक्षा गर्ने क्षमता राख्न सक्नुपर्ने भनेर प्रवचन दिए ।
श्रेष्ठले ओलीको विरोध गर्दै भने, ‘अदालतको निर्णयमा असहमति जनाउन र आलोचना गर्न सकिन्छ तर व्यङ्ग्य र तुष्टिकरण गर्नुको अर्थ रहन्न ।’ जबकी संविधानमै नभएको फैसला दिएको भनेर चर्को आलोचना भइरहहेको छ ।
पूर्वप्रधानन्यायाधीश सुशीला कार्कीले राजनीतिक दलमा राजनीतिक संस्कार नभएकै कारण गणितीय हिसाबमा बलियो भएर पनि पूरा अवधि रहन नसकेको टिप्पणी गरिन् । उनको भनाईले ओलीको विघटन ठिक थियो भन्ने पुष्टि हुने देखाउँछ । किनभने ओलीले विघटन गर्दा माओवादी कांग्रेसलाई राम्रो देख्ने सुशीला अहिले सबै उस्तै रहहेछन् भन्नेमा पुगेकी छन् ।
यति हुँदाहुँदै ओली आक्रामक विपक्षी हुँदा उनी डराएको उनको अभिव्यक्तिबाट थाहा हुन्छ । ‘राजनीतिक संस्कार पहिलो शर्त हो, हामीसँग अनुशासनमा बस्ने अनि एक–अर्कालाई सम्मान गर्ने बानी छैन, प्रतिपक्षले विरोध गर्यो भनेर घोक्रेठ्याक लगाउने होइन, विरोध र स्वस्थ आलोचनाले सही बाटो देखाउँछ, एकले अर्कालाई पछारेको अनि राजनीतिको मल्ल युद्ध हेरेर मात्र जनताले अघाउनुपर्ने अवस्था अब अन्त्य हुनुपर्छ, नेता सुध्रनुस् ।’
