सिरहा । प्रदेश २ को सिरहास्थित ठाडी भन्सार कार्यालयले लक्ष्यभन्दा बढी राजस्व असुली गरेको छ । भन्सार कार्यालयले यो वर्ष लक्ष्यभन्दा करिब ३ करोड रुपैयाँ बढी असुली गरेको हो ।
आर्थिक वर्ष २०७७/७८ मा कार्यालय लक्ष्यभन्दा दुई करोड ८९ लाख ९२ हजार रुपैयाँ बढी राजस्व असुली गरेको हो ।
६ करोड ५६ लाख २० हजार रुपैयाँ लक्ष्य रहेको कार्यालयले नौ करोड ४६ लाख १२ हजार रुपैयाँ असुली गरेको भन्सार कार्यालयले जनाएको छ । जेठ र असार महिनामा लक्ष्यअनुसार राजश्व असुली गर्न नसके पनि वर्ष दिनको लक्ष्यभन्दा ४४ प्रतिशत बढी राजस्व असुली भएको कार्यालय प्रमुख नरेश साहले जानकारी दिए ।
उनले लहान–ठाडी सडकखण्डअन्तर्गत भगवानपुर गाउँपालिका–२ नरहामा सडक निर्माण कार्यले गर्दा सवारी साधन आवतजावत सहज नहुँदा पनि लक्ष्यभन्दा बढी राजस्व असुली भएको बताए ।
कार्यालयले धान, गहुँ, फलफूल, ताजा तरकारी र टायल्सवाट राजस्व असुली गरेको भन्दै कार्यालय प्रमुख साहले फाटफुट रुपमा दैनिक उपभोग्य, लत्ताकपडा र स्पेयर पार्टसबाट पनि राजस्व असुली गरेको साहको भनाइ छ ।
कुन महिनामा कति असुली ?
कार्यालय अनुसार साउनमा ९५ लाख ६ हजार, भदौमा १ करोड २३ लाख ८० हजार, असोजमा ८७ लाख ८० हजार र कार्तिकमा ५३ लाख ५९ हजार, रुपैयाँ राजस्व संकलन भएको छ ।
यस्तै, मंसिरमा ६० लाख ५२ हजार, पुसमा १ करोड १४ लाख ९२ हजार, माघमा ८१ लाख ७८ हजार, फागुनमा १ करोड २ लाख ४७ हजार, चैतमा १ करोड २ लाख १९ हजार, वैशाखमा ९१ लाख ८० हजार, जेठमा २३ लाख ६५ हजार र असारमा ८ लाख ५४ हजार राजस्व असुली गरिएको छ ।
आर्थिक वर्ष २०७६/७७ मा कार्यालयले लक्ष्यभन्दा करिब ३ करोड रुपैयाँ बढी राजस्व असुली गरेको थियो । ४ करोड ७९ लाख १४ हजार लक्ष्य रहेकोमा ७ करोड ६४ लाख १५ हजार राजश्व असुली भएको प्रमुख साहले बताए ।
