बारा र रौतहटमा उतपात मच्चाउँदै भारत पसेको जंगली हात्तीको आक्रमणबाट एक पत्रकार गम्भीर घाइते भएका छन् । रौतहटबाट आइतबार बिहान भारत पसेको हात्तीको आक्रमणबाट भारतीय पत्रकार पुरुषोत्तमकुमार महतो गम्भीर घाइते भएका हुन् ।
बिहार राज्यमा पर्ने सीतामढी जिल्लास्थित सुप्पी प्रखण्ड क्षेत्रमा जंगली हात्ती पुगेको खबर पाइपछि रिपोर्टिङ गर्न पुगेका स्थानीय पत्रकार महतोमाथि हात्तीले आक्रमण गरेको हो ।
ती पत्रकारलाई क्यामेरा लिएर हात्तीनजिकै पुगेर भिडियो बनाउने क्रममा हात्तीले आक्रमण गरेको प्रत्यक्षदर्शीको भनाइ छ । गम्भीर घाइते महतोको अहिले सितामढी अस्पतालमा उपचार भइरहेको जनाइएको छ ।
शुक्रबार बिहान खेतमा काम गरिरहेका बाराको कलैया अवधापुरमा एकजना किसानको ज्यान लिएको सो हात्ती शनिबार रौतहट पसेर वितण्डा मच्चाएको थियो । आइतबार बिहान सदरमुकाम गौर हुँदै हात्ती भारततिर प्रवेश गरेको हो ।
