सिरहा–धनुषा जिल्ला जोड्ने कमला नदीको निर्माणाधीन पुल भासिएको विरोधमा सिरहामा प्रर्दशन भएको छ ।
हुलाकी सडक संघर्ष समितिले पुलको पुनर्निर्माण र छानबिन माग गर्दै आइतबार सिरहा सदरमुकाममा प्रदर्शन गरेको हो ।
झण्डै १० वर्षदेखि निर्माणाधीन अवस्थामा रहेको कमला पुल गत असार १३ गते सम्पन्न भइसक्ने सम्झौता भएको थियो । तर, समयमै निर्माण सम्पन्न हुन नसकेपनि अन्तिम चरणमा पुगिसकेको पुल निर्माणको काम सम्पन्न नहुँदै सामान्य बाढी थेग्न नसकेर बिहीबार भत्किएको थियो ।
उनीहरूले कमला पुलको लागि जाँच आयोग गठन गर, भ्रष्ट ठेकेदार मुर्दाबाद, ठेकेदार र सरकारको साँठगाँठ मुर्दाबाद, ठेकेदार, कर्मचारी र प्राविधिक साँठगाँठ मुर्दाको नारासहित आइतबार सदरमुकाममा प्रदर्शन गरे । कमिसनको खेलमा कमसल निर्माण गरिएकोले पुल भासिएको संघर्ष समितिको आरोप छ ।
संघर्ष समितिले प्रदर्शनपछि प्रमुख जिल्ला अधिकारी प्रदीपराज कँडेललाई ज्ञापनपत्र पनि बुझाएको छ । पुल सञ्चालनमा नआउँदै भत्किँदा वर्षौंदेखिको जनताको आशा र भरोषामाथि तुषारापात भएको ज्ञापनपत्रमा उल्लेख छ ।
डिजाइन र निर्माणमा चरम लापरबाही भएको देखिएको भन्दै तुरुन्त जाँच आयोग गठन गरी सत्यतथ्य बाहिर ल्याउन संघर्ष समितिले माग गरेको छ ।
हुलाकी सडक आयोजना कार्यालय, जनकपुरलाई बोधार्थ राखिएको संघर्ष समितिका अध्यक्ष मनोज पासवानद्वारा हस्ताक्षरित सो ज्ञापनपत्रमा यसमा ढिलाइ भए कडा आन्दोलनमा जान बाध्य हुने चेतावनीसमेत दिए ।
छानबिन समिति गठन र पुल पुनर्निर्माणको टुंगो चाँडै नलागे आन्दोलनको प्रारुप बढ्ने युवा अरविन्द यादवले बताए ।
पुल निर्माणका लागि सुरुमा पप्पु कन्स्ट्रकसनले २०६८ सालमा ४२ महिनाभित्र सक्ने गरी ठेक्का पाएको थियो । तर, उसले ७ वर्षसम्म सुस्त गतिमा काम गरेपछि हुलाकी राजमार्ग निर्देशनालय जनकपुरधामले लुम्बिनी बिल्डर्सलाई २०७८ असार १३ गते काम सक्ने गरी निर्माणको जिम्मा दिएको थियो ।
तर, विगत तीन वर्षदेखि लुम्बिनी बिल्डर्सले निर्माण गरिरहेको कमला पुल आगामी साउनदेखि सञ्चालनमा ल्याउने तयारी भइरहँदा उद्घाटन अगाबै सामान्य बाढीमा भासिन पुगेको हो ।
