काठमाडौं । एक करोडभन्दा बढीको लागतमा दाङको घोरदौरामा निर्माणाधीन खुल्ला नाचघर बर्खा थेग्न नसकेर भत्किएको छ ।
सदरमुकाम घोराहीदेखि करिब ६ किलोमिटर उत्तर पूर्वमा रहेको घोरदौरा गाउँलाई पर्यटकीय क्षेत्रका रूपमा विकास गर्ने निर्णयअनुसार दुई कोठे नाचघर र दर्शकदीर्घा बस्ने ठाउँ बनाइएको थियो ।
घोराही उपमहानगरपालिकाका प्रवक्तासमेत रहेका वडा नं. १८ का अध्यक्ष भरत अर्यालले नाचघर भत्किएको जानकारी आफूलाई आएको बताए ।
‘निर्माणको क्रममै रहेको बेला हिजो (शनिबार) आएको पानीले ट्वाइलेटतिरको भाग भत्किएको सूचना मलाई आएको छ,’ अर्यालले भने, ‘आज दिउँसोतिर इन्जिनियरलाई लगेर हेर्न जाने तयारी गरिरहेको छु ।’
आफूलाई शौचालयतिरको भाग भत्किएको सूचना आएको बताउँदै अर्यालले क्षतिको विस्तृत विवरण आइनसकेको बताए । यद्यपि सामाजिक सन्जालमा सार्वजनिक भएका तस्वीरमा भने दर्शकदीर्घा बस्ने ठाउँ पनि भत्किएको देखिन्छ । वन कार्यालयको प्राविधिक सहयोगमा निर्माण थालिएको सो नाचघर ठेकदारले घोराही उपमहानगरपालिकालाई हस्तान्तरण गर्न बाँकी छ ।
लागत अनुसारको संरचना नबनेको भन्दै उठेको थियो प्रश्न
घोरदौराबाट हिमश्रृंखलासमेत देखिने भएकाले त्यसलाई पर्यटकीय क्षेत्रको रुपमा विकास गर्ने सोचअनुसार नाचघर बनाउने निर्णय गरिएको थियो । त्यसका लागि लुम्बिनी प्रदेश सरकारले १ करोड बजेट दिएको थियो । दोस्रोपटक पनि थप ६० लाख बजेट छुट्याइएको थियो।
नाचघर बनाउन भिरालो जमिनलाई डोजर प्रयोग गरेर मैदान बनाइएको थियो । नजिकै रहेको खाल्डोलाई जमिनको सतहसँग बराबर गर्नका लागि पर्खाल निर्माण गरिएको थियो । स्टेजमा ओतका लागि टिनको छानो र दर्शकदीर्घाका लागि ढुंगाको पेटी बनाइएको थियो । नाचघरको संरचना हेर्दा सामान्य लाग्छ । त्यसैले लागत अनुसारको संरचना नबनेको भन्दै कतिपयले प्रश्न उठाउँदै आएका थिए ।
