महेश सिंह, सिरहा (लहान) — ‘रक्तदान जीवनदान’ भन्ने सन्देशलाई व्यवहारमा उतार्ने उद्देश्यसहित मधेश प्रदेशका विभिन्न जिल्लामा एकैसाथ ‘मधेश महा–रक्तदान कार्यक्रम’ आयोजना गरिएको छ। ‘Blood for Nepal’ को अग्रसरतामा सञ्चालन गरिएको उक्त अभियानले रक्तदानसम्बन्धी जनचेतना अभिवृद्धि गर्नुका साथै आकस्मिक अवस्थामा हुने रगत अभाव न्यूनीकरण गर्ने लक्ष्य लिएको आयोजकले जनाएको छ।
सिरहाको नवराजपुर गाउँपालिका–४ स्थित सोनवर्षा चोकमा सम्पन्न कार्यक्रममा बिहानैदेखि स्थानीय युवाहरू, समाजसेवी तथा सर्वसाधारणको उल्लेखनीय उपस्थिति देखिएको थियो। सहभागीहरूले स्वेच्छिक रूपमा रक्तदान गर्दै मानवीय सेवाप्रति ऐक्यबद्धता जनाएका थिए। कार्यक्रममा करिब ३० जनाले रक्तदान गरेको जानकारी संयोजक सन्तोष कुमार यादवले दिए।
कार्यक्रममा जेसीआई लहान सिटी लगायतका संघसंस्थाको सहकार्य रहेको थियो भने प्राविधिक सहयोग नेपाल रेडक्रस सोसाइटी, रक्तसञ्चार सेवा केन्द्रले उपलब्ध गराएको थियो। आयोजकका अनुसार यस्तो अभियानले युवाहरूमा सकारात्मक सोच विकास गर्नुका साथै सामाजिक उत्तरदायित्वबोध अभिवृद्धि गर्ने अपेक्षा गरिएको छ।
अभियान अन्तर्गत ‘रक्तका कुरा’ जस्ता जनचेतनामूलक सन्देशसमेत प्रवाह गरिएको थियो। यसमार्फत रक्तदानसम्बन्धी भ्रमहरू हटाउँदै आवश्यक जानकारी प्रदान गर्ने प्रयास गरिएको आयोजकको भनाइ छ।
कार्यक्रममा समाजसेवी जयकिशोर यादव, शिवदेव साह, रोबिन यादव, शैलेन्द्र यादव, बिश्वनाथ कामैत लगायत सयौं युवाहरूको सहभागिता रहेको समाजसेवी जयकृष्ण यादवले जानकारी दिए।
स्वास्थ्य क्षेत्रका विज्ञहरूले नियमित रक्तदानले मानव जीवन बचाउन महत्वपूर्ण भूमिका खेल्ने भएकाले यस्ता अभियानलाई निरन्तरता दिन आवश्यक रहेकोमा जोड दिएका छन्। सहभागीहरूले पनि आगामी दिनमा यस्ता सामाजिक अभियानमा अझ सक्रिय रूपमा जोडिने प्रतिबद्धता व्यक्त गरेका छन्।
