महेश सिंह लहान- जिल्ला ट्राफिक प्रहरी कार्यालय सिरहाले सञ्चालन गरेको ‘सप्ताहव्यापी सडक सुरक्षाअभियान’ अन्तर्गत सोमबार रक्तदान कार्यक्रम सम्पन्न भएको छ। पाँचौं दिनको कार्यक्रममा सयौं व्यक्तिले रक्तदान गरेका छन्।
पूर्व–पश्चिम राजमार्गमा सञ्चालन हुने सवारीसाधनका चालकहरूको स्वास्थ्य परीक्षणसहित आँखाको जाँच गरिएको ट्राफिक प्रहरीले जनाएको छ। जिल्ला ट्राफिक प्रहरी कार्यालय सिरहाका इन्चार्ज तथा प्रहरी निरीक्षक पोषणराज थपलियाको नेतृत्वमा चालकहरूलाई सुझावसहित परामर्श प्रदान गरिएको हो।
कार्यक्रममा ईलाका प्रहरी कार्यालय लहानका प्रमुख, प्रहरी नायब निरीक्षक कैलाश रायले पनि रक्तदान गर्दै आँखाको परीक्षण गराएका थिए।
पछिल्लो समय ट्राफिक प्रहरीले सडक सुरक्षासँगै सामाजिक जिम्मेवारी वहन गर्ने उद्देश्यले विविध जनचेतनामूलक तथा सेवामूलक गतिविधि सञ्चालन गर्दै आएको छ।
कार्यक्रममा रेडक्रस सोसाइटी लहान शाखाका इन्चार्ज प्रदीप कुमार यादव (मनिष) को पनि उपस्थिति थियो। प्रहरी चौकी पकिटोलका असई आरएन यादवसहित दर्जनौं प्रहरी जवानले रक्तदान गरेका छन्।“अरुको जीवनरक्षाका लागि गरिएको यो रक्तदान हाम्रो सामाजिक कर्तव्य हो,” एक सहभागी प्रहरीले बताए।
