काठमाडौं । संयुक्त अरब इमिरेट्स (यूएई) को रक्षा मन्त्रालयले घोषणा गरेअनुसार इरानले प्रहार गरेका १३७ वटा ब्यालिस्टिक मिसाइल र २०९ वटा ड्रोनमध्ये अधिकांशलाई देशको हवाई प्रतिरक्षा प्रणालीले सफलतापूर्वक अवरोध गरेको छ।
मन्त्रालयले जारी गरेको विज्ञप्तिमा वायुसेना र हवाई प्रतिरक्षा प्रणालीले उच्च तयारी र विभिन्न खतरासँग सामना गर्ने क्षमता प्रदर्शन गरेको उल्लेख छ।
आक्रमणका क्रममा १३७ मिसाइलमध्ये १३२ अवरोध गरिएको र पाँचवटा समुद्रमा खसेको पुष्टि गरिएको छ। त्यस्तै, २०९ ड्रोनमध्ये १९५ अवरोध गरिएको र १४ वटा देशको भूमि तथा जल क्षेत्रमा खसेर केही क्षति पुर्याएको बताइएको छ।
मिसाइल र ड्रोन अवरोधका क्रममा टुक्रा विभिन्न स्थानमा खसेर केही नागरिक सम्पत्तिमा सानो भौतिक क्षति भएको मन्त्रालयले जनाएको छ।
यूएईका अधिकारीहरूले अनुमोदित प्रक्रियाअनुसार तुरुन्तै प्रतिक्रिया जनाउँदै प्रभावित स्थानहरू सुरक्षित गर्ने र जनताको सुरक्षाका लागि आवश्यक कदम चालिएको बताएका छन्।
रक्षा मन्त्रालयले आक्रमणलाई “गम्भीर उक्साहट” तथा “कायरतापूर्ण कार्य” भन्दै कडा शब्दमा निन्दा गरेको छ। यसले नागरिकको सुरक्षालाई खतरा पुर्याउने र क्षेत्रीय स्थायित्वलाई कमजोर पार्ने कार्य भएको भन्दै यूएईले आफ्नो भूभाग, नागरिक र राष्ट्रिय हितको रक्षा गर्न आवश्यक कदम चाल्ने अधिकार सुरक्षित राखेको स्पष्ट पारेको छ।
