काठमाडौं। काठमाडौं महानगरपालिकाले रु पाँच करोड २० लाखको लागतमा नरः दे (हाँडीगाउँ) मा रहेको गहनापोखरी पुनःनिर्माणको काम सुरु गरेको छ। क्षमा पूजा गरेर थालिएको पोखरीको पुनःनिर्माण २०८३ असोज ३० गतेभित्र सम्पन्न गरिसक्नुपर्नेछ।
‘हाँडीगाउँ प्राचीन शैलीमा फर्काउने गुरुयोजनाअन्तर्गत हामीले काम गरिरहेका छौँ,’ पुनःनिर्माणका विषयमा वडाध्यक्ष वीरेन्द्र प्रजापती भन्छन्, ‘मौलिकता र सांस्कृतिक पहिचान, पुनःनिर्माणका मुख्य आधार हुन्। विगतमा भएका कमजोरी सच्याउँदै अहिले हामी प्राचीन शैली पछ्याइरहेका छौँ। सांस्कृतिक मूर्त सम्पदाको पुनःस्थापनामा कापाको यो महत्त्वपूर्ण योजना हो।’
सम्पदा तथा पर्यटन विभागका प्रमुख कुमारी राईले भनिन्, ‘कामपाको लगानीबाट सहरले प्राचीनस्वरूप प्राप्त गर्दै छ। यसबाट सबैले गर्व गर्न सक्ने संरचना तयार हुनेछ। हाँडीगाउँ प्राचीन शैलीमा फर्काउने गुरुयोजना अन्तर्गत हामीले काम गरिरहेका छौँ।’
योजनाका सम्पर्क व्यक्ति वरिष्ठ इन्जिनियर रवीन्द्र रिजालका अनुसार पोखरी, त्यसको वरिपरि पैदलमार्ग, हरियाली प्रवर्द्धन र सडक आडमा भएका खाली ठाउँमा फल्चा, खेल्ने ठाउँलगायत संरचना हुनेछन्। त्यसमध्ये १३ हजार वर्ग फिटमा पोखरी निर्माण हुनेछ। पोखरीको वरिपरि ६ फिटदेखि ८ फिटसम्मको पैदलमार्ग हुनेछ। त्यसको बाहिर कालोपत्र सडक छ।
यसको बाहिर दक्षिणतर्फ एक सय वर्ग फिट क्षेत्रफलको ३ कवलको एउटा र उत्तरपट्टी ३१७ वर्ग फिट क्षेत्रफल भएको ९ कवलको एउटा फल्चा निर्माण हुनेछ। दक्षिण–पश्चिममा २९६ वर्ग फिट क्षेत्रफलको प्रहरी विट निर्माण हुनेछ। यसको नजिकमा ५९० वर्ग फिट क्षेत्रफल भएको भवन निर्माण हुनेछ। जसको तल्लो तलामा पर्यटक सूचना केन्द्र र माथिल्लो तलामा पुस्तकालय हुनेछ।
गहना पोखरीसँग सम्बन्धित लोक कथन
गहना खोज्ने जात्रा सञ्चालन हुने पोखरी, कुनै बेला आगो निस्किरहने तलाउ थियो। त्यहाँ सुनको पेटिका प्रकट हुन्थ्यो।
त्यो पेटिकालाई कसैले लिने प्रयास गर्यो भने ऊ तलाउमा डुब्थ्यो। त्यहाँबाट फर्कनै सक्दैनथ्यो। त्यो पेटिकाको सुन भावी बुद्ध बोधिसत्व मैत्रेयको मुकुटको सुन थियो भन्ने गरिन्छ। यसलाई अग्निवमन गर्ने नागहरूले सुरक्षा दिएर राखेका थिए।
