महेश सिंह लहान,लायन्स क्लब अफ लहान सिटीले नवनिर्वाचित अध्यक्ष ललित नारायण महतोको नेतृत्वमा प्रादेशिक अस्पताल लहानमा उपचाररत बिरामीहरूलाई फलफूल वितरण गरेको छ।
पदभार ग्रहणसँगै समाजसेवाको भावनाले प्रेरित भई अध्यक्ष महतोले अस्पतालमा भर्ना भएका बिरामीहरूलाई भेट्दै स्वास्थ्य लाभको कामना गर्दै फलफूल वितरण गरेका हुन्।
कार्यक्रम क्लबका दर्जनौं प्रतिनिधिहरूको सहभागिता र अस्पताल व्यवस्थापक धनोज कुमार गुप्ताको रोहबरमा सम्पन्न भएको थियो। क्लबका सचिव राकेश झाले यो कार्यक्रम नयाँ कार्यसमितिको पहिलो सामाजिक उत्तरदायित्वका रूपमा सम्पन्न भएको जानकारी दिए।
क्लबले पछिल्ला वर्षहरूमा सामाजिक सेवा, स्वास्थ्य, शिक्षा र विपद् व्यवस्थापनका क्षेत्रमा उल्लेखनीय योगदान गर्दै आएको छ। यस कार्यक्रममार्फत क्लबले पुनः समाजप्रतिको आफ्नो दायित्वप्रति प्रतिबद्धता जनाएको हो।
ललायन्स क्लब लहान सिटीले आगामी दिनमा पनि यस्ता सामाजिक सेवामूलक कार्यक्रमलाई निरन्तरता दिने बताएको छ।
