बेलग्रेड । सर्बिया सरकारले कृत्रिम बुद्धिमत्ता (एआई) र हरित प्रविधिमा आधारित अनुसन्धान कार्यलाई प्रवद्र्धन गर्न दुईवटा नयाँ अनुदान कार्यक्रमको घोषणा गरेको छ। सरकारका अनुसार यी कार्यक्रमअन्तर्गत ११ करोड अमेरिकी डलरभन्दा बढी बराबरको सहयोग प्रदान गरिनेछ।
सर्बियाको विज्ञान कोषका निर्देशक नेनाद फिलिपोभिचका अनुसार ‘कृत्रिम बुद्धिमत्ता अनुसन्धान परियोजना कार्यक्रम’ अन्तर्गत नौ करोड ८४ लाख अमेरिकी डलर बराबरको रकम विनियोजन गरिएको छ। दुई वर्षसम्म सञ्चालन हुने यस कार्यक्रमले स्वास्थ्य सेवा, जैव प्रविधि, शिक्षा, कृषि तथा सूचना सुरक्षालगायत क्षेत्रका २५ देखि ३० परियोजनालाई सहयोग पुर्याउनेछ। उक्त कार्यक्रम युरोपेली संघ र विश्व बैंकको सहकार्यमा अघि बढाइने जनाइएको छ।
त्यस्तै, ‘हरित कार्यक्रम–विज्ञान तथा उद्योग सहकार्य’को दोस्रो चरणका लागि एक करोड १७ लाख अमेरिकी डलर बराबरको रकम छुट्याइएको छ। राष्ट्रिय बजेटबाट सञ्चालित यो कार्यक्रम एक वर्ष सञ्चालन हुनेछ। कार्यक्रमले वातावरण संरक्षण, फोहोर तथा फोहोरपानी व्यवस्थापन, माटो र हावाको शुद्धता तथा जैविक विविधताको संरक्षणमा केन्द्रित रहनेछ।
सर्बियाकी वातावरण संरक्षण मन्त्री सारा पाव्कोभले कार्यक्रमहरूको सुरुवातप्रति खुसी व्यक्त गर्दै भनिन्, “म यो हरित कार्यक्रमबाट वातावरणीय रूपान्तरणका लागि अत्यावश्यक नवीन समाधानहरू प्राप्त हुने अपेक्षा राख्छु। यी प्रयासहरूले हामीलाई स्वच्छ र दिगो भविष्यतर्फ अघि बढाउन मद्दत गर्नेछन्।”
सर्बिया सरकारले विज्ञान र प्रविधिमा लगानी बढाउँदै दिगो विकास तथा नवप्रवर्तनलाई प्राथमिकता दिएको स्पष्ट भएको छ।
