काठमाडौं । प्रधानमन्त्री तथा नेकपा (एमाले) अध्यक्ष केपी शर्मा ओलीले पार्टीभित्र स्वार्थ केन्द्रित केही तत्वले महाधिवेशन नआएको अवस्थामा नै महाधिवेशन लागेको जस्तो वातावरण बनाउन खोजिरहेको टिप्पणी गरेका छन्।
जननेता मदन भण्डारीको ७४औं जन्मजयन्तीको अवसरमा शुक्रबार चन्द्रागिरी नगरपालिका–१३, कङ्कालीमा आयोजित वृक्षरोपण कार्यक्रमको शुभारम्भ गर्दै प्रधानमन्त्री ओलीले पार्टीको मूल लक्ष्य मिसन–२०८४ रहेको उल्लेख गर्दै पार्टीभित्र अनुशासनहीन र स्वार्थी प्रवृत्तिको प्रतिकार गरिने चेतावनी दिए।
उनले भने, “हामी अर्जुन दृष्टिका साथ मिसन २०८४ को अभियानमा छौं। हाम्रो स्वार्थ देशको समृद्धि, विकास र सुशासन हो। यस मिसनमा सबै एकजुट भएर लाग्नुपर्ने बेलामा केही स्वार्थीलाई महाधिवेशन लागेको मात्रै हो, हाम्रा कार्यकर्तालाई होइन। त्यसकारण त्यस्ता स्वार्थीहरुको पछि लाग्नु हुँदैन।”
प्रधानमन्त्री ओलीले स्पष्ट रूपमा पार्टीको नेतृत्वको परिपक्वता र स्थायित्वलाई कमजोर पार्ने प्रयास सफल नहुने पनि संकेत गरे।
यसै अवसरमा उनले एसइई परीक्षाको नतिजा सुधारमा शिक्षक, विद्यार्थी र अभिभावकको भूमिकालाई प्रशंसा गर्दै यो वर्ष १४ प्रतिशत बढी विद्यार्थी उत्तीर्ण भएकोमा खुसी व्यक्त गरे। आउँदो वर्षका लागि निःशुल्क अनलाइन कक्षा सञ्चालन गरी विद्यार्थीको स्तरमा अझ सुधार ल्याइने जानकारी दिए।
“मौका परीक्षामा सहभागी हुने विद्यार्थी र आउँदा एसईई तयारी गर्नेहरूका लागि देशभर महत्त्वपूर्ण विषयमा अनलाइन कक्षा सञ्चालन गरिनेछ,” उनले घोषणा गरे।
कार्यक्रममा राष्ट्रिय युवा संघका प्रतिनिधि, पार्टीका स्थानीय नेता तथा कार्यकर्ताहरूको उपस्थिति थियो। वृक्षरोपण कार्यक्रममार्फत जननेता मदन भण्डारीको स्मृतिमा वातावरण संरक्षणको सन्देश प्रवाह गरिएको आयोजकले जनाएका छन्।
