शिक्षक तथा स्वास्थ्यकर्मीहरु आन्दोलनको तयारी

89

धनुषा : धनुषाको मुखियापट्टी मुसहरनिया गाउँपालिकामा कार्यरत शिक्षक तथा स्वास्थ्यकर्मीहरु बक्यौता तलब भुक्तानीको मांग गर्दै आन्दोलनको तयारीमा छन ।
सो गाउँपालिकामा प्रावि तथा मावि गरी ११ वटा विद्यालयमा कार्यरत शिक्षक र ४ वटा स्वास्थ्य संस्था (हेल्थ पोष्ट) मा कार्यरत स्वास्थ्यकर्मीहरुको तलब बाँकी रहेको जनाइएको छ ।
स्वास्थ्यकर्मीहरुका अनुसार आर्थिक वर्ष २०७६÷०७७ को जेठ महिनादेखि सीएमए, अहेव र एचए गरी ३५ जना स्वास्थ्यकर्मीको तलब, दशैं पेश्की र क्वारेन्टाईनमा खटेको जोखिम भत्ता बाँकी रहेको छ ।
त्यस्तै शिक्षकतर्फ प्रावि तहका १० वटा विद्यालयका शिक्षकहरुको असार र एकवटा मावि तहका शिक्षकहरुको वैशाख महिनादेखि नै तलब बाँकी रहेको छ । मावि तहमा ६ जना र प्रावि तहमा ८०, बालविकास तर्फ ८२ र कर्मचारी १२ जनाको तलब पाउन सकेका छैनन ।
स्वास्थ्यकर्मी र शिक्षकहरुले बक्यौता तलबको मांग गर्दै पछिल्लो साता जिल्ला प्रशासन कार्यालयमा ज्ञापन पत्र समेत बुझाएका छन ।
स्वास्थ्यकर्मी जयकुमार यादवले भने हामीले पटक पटक बक्यौता तलब माँग गर्दै आएका छौं तर प्रमुख प्रशासकीय अधिकृतले आफूलाई गाउँपालिका अध्यक्षले अख्तियारी नदिएको कारण भुक्तानी गर्न नमिल्ने भनी कुरा टार्दै आएको छ ।
के कति कारणले शिक्षक र स्वास्थ्यकर्मीको तलब भुक्तानी गर्न सकिएन भने जिज्ञासामा तलब बक्यौता रहेको स्वीकार गर्दै प्रमुख प्रशासकीय अधिकृत सुशोध कुमार ठाकुरले ईकागज सँग भने बजेट कार्यक्रम तयार हुन नसकेको र अख्तियारी आफ्नो आउन नसक्दा तलब बाँकी रहन गएको हो ।
उता अध्यक्ष मनोज यादव र उपाध्यक्ष मीरादेवी महतोलाई पटक पटक फोन गर्दा पनि मोबाइल रिसिभ नगर्दा कहिलेसम्म बजेट कार्यक्रम तयार पारी पारित गराउने हो भन्ने कुरा यकिन हुन सकेको छैन ।