जनकपुर, — बंगलादेशमा हालै हिन्दूवादी नेता भाबेशचन्द्र रायको निर्मम हत्या पश्चात जनकपुरमा ‘राष्ट्रिय एकता अभियान’ले तीव्र विरोध प्रदर्शन गर्दै बंगलादेशका कार्यकारी प्रधानमन्त्री मोहम्मद युनुसको पुत्ला दहन गरेको छ। प्रदर्शनकारीहरूले “बंगलादेशमा हिन्दूहरूको हत्या बन्द गर”, “अल्पसंख्यकको सुरक्षा ग्यारेन्टी गर”, “प्रधानमन्त्री युनुस मुर्दाबाद”, र “इस्लामिक आतंकवादी मुर्दाबाद” जस्ता नारा घन्काउँदै आक्रोश पोखेका थिए।
यस विरोध प्रदर्शनका क्रममा विभिन्न वक्ताहरूले अन्तर्राष्ट्रिय समुदायको ध्यान बंगलादेशमा बढ्दो धार्मिक कट्टरता र अल्पसंख्यकहरूमाथि भइरहेका आक्रमणतर्फ आकृष्ट गराए। उनीहरूले हिन्दू समुदायको संरक्षण नहुनु अन्तर्राष्ट्रिय मानव अधिकारको उल्लंघन भएको भन्दै संयुक्त राष्ट्रसंघ, मानव अधिकार संगठनहरू र शक्तिशाली लोकतान्त्रिक राष्ट्रहरूले चाँडै हस्तक्षेप गर्नुपर्ने माग राखे।
राष्ट्रिय एकता अभियानका अगुवाहरूले इस्लामिक आतंकवाद अब कुनै राष्ट्रको मात्रै समस्या नभएर सम्पूर्ण विश्व सभ्यतामाथिको खतरा भएको बताए। “आज भाबेशचन्द्र रायको हत्या भएको छ, भोलि विश्वका जुनसुकै कुनामा इस्लामिक अतिवादले निर्दोषको ज्यान लिन सक्छ। यसलाई समयमै रोक्न सकिएन भने मानवीय सभ्यता नै संकटमा पर्न सक्छ,” अभियानका नेता मनीष पुर्वेले ले भने।
प्रदर्शनकारीहरूले बंगलादेश सरकारसँग अल्पसंख्यकहरूको संरक्षणका लागि कडा नीति अवलम्बन गर्न आग्रह गरे भने, युनुस नेतृत्वको मौनता र असहिष्णुता प्रति गम्भीर आपत्ति जनाए। जनकपुरको यो आन्दोलनले इस्लामिक कट्टरपन्थ विरुद्ध आवाज उठाउने क्षेत्रीय र अन्तर्राष्ट्रिय पहललाई थप ऊर्जा दिने विश्वास गरिएको छ ।
