महेश सिंह लहान – जीवन विकास लघुवित्त वित्तीय संस्था लिमिटेडको आयोजनामा सिरहाको धनगढी शाखा कार्यालयद्वारा एक दिवसीय हाजिरी जबाफ तथा खेलकुद प्रतियोगिता सम्पन्न भएको छ।
कार्यक्रम माध्यमिक विद्यालय, कुर्वामा आयोजना गरिएको थियो। यस प्रतियोगितामा विद्यालयका विद्यार्थीहरूबीच विभिन्न खेलकुद प्रतिस्पर्धा तथा ज्ञानवर्धक हाजिरी जबाफ प्रतियोगिता सम्पन्न भयो।
संस्थाले वित्तीय साक्षरताका साथै बालबालिकाहरूको शारीरिक र मानसिक विकासका लागि यस्ता प्रतियोगिताहरू आयोजना गर्दै आइरहेको छ। जीवन विकास लघुवित्त वित्तीय संस्था लिमिटेड नेपाल राष्ट्र बैंकबाट इजाजतप्राप्त “घ” वर्गको राष्ट्रिय स्तरको लघुवित्त संस्था हो। यस संस्थाले ग्रामिण भेगमा वित्तीय सेवा तथा सशक्तिकरणका कार्यक्रम सञ्चालन गर्दै आइरहेको छ। उक्त कार्यक्रममा ओरेक नेपालका मधेस प्रदेश संयोजक बिना सिंहको समेत कार्यक्रममा उपस्थिति रहेको आयोजकले जनाए।
संस्थाले आगामी दिनहरूमा पनि समुदायका लागि यस्ता कार्यक्रम आयोजना गर्दै जाने प्रतिबद्धता व्यक्त गरेको छ। जीवन विकास लघुवित्तका शाखा प्रमुख सुरेश प्रसाद गनगाईका अनुसार विद्यार्थीहरूलाई शिक्षा प्रति अझै प्रोत्साहित गर्दै पढाईमा उत्साह बढाउन प्रतियोगिता आयोजना गरिएको हो।
उक्त संस्थाले सामाजिक उत्तरदायित्व निर्वाह गर्दै पछिल्लो समय सामाजिक कार्यमा पनि सक्रिय भूमिका निर्वाह गर्दै आएको छ। कार्यक्रमको प्रमुख अतिथि धनगढीमाई नगरपालिका वडा नम्बर ३ का अध्यक्ष बिरेन्द्र कुमार साह रहेका थिए। धनगढी शाखामा प्रमुख सहित ४ जना कर्मचारीले सेवा प्रदान गर्दै आएका छन् भने जीवन विकास लघुवित्तका संस्थापक अध्यक्ष संजय कुमार मण्डल हुन्।
हाल देशभर ३१ जिल्लामा १६० शाखा सञ्चालन गर्दै सेवा प्रदान गरिरहेको संस्थाले यस प्रतियोगितामा ६ कक्षा देखि ९ कक्षासम्मका विद्यार्थीहरूको सहभागिता सुनिश्चित गरेको थियो। विद्यालयका प्रधानाध्यापक हरि प्रसाद यादवका अनुसार कुल ६१० विद्यार्थी अध्ययनरत विद्यालयमा प्रतियोगिता निकै उत्साहजनक रह्यो। शिक्षक तारिणी प्रसाद चौधरी र शिवदयाल यादवका अनुसार प्रतियोगितामा प्रथम हुने विद्यार्थीहरूलाई फुटबल, डाइरी, कपी लगायत शैक्षिक सामग्री वितरण गरिएको छ।
