उपेन्द्र यादव नेतृत्वको जनता समाजवादी पार्टी नेपालले सरकारले ल्याएको अध्यादेश सकारात्मक रहेको निष्कर्ष निकाल्दै समर्थन गर्ने संकेत गरेको छ।
जसपा नेपालद्वारा ‘अध्यादेश’ अध्ययन गर्न गठित कार्यदलले प्रधानमन्त्री केपी शर्मा ओली नेतृत्वको गठबन्धन सरकारले ल्याएको अध्यादेशको प्रक्रिया गलत भएपनि उदेश्य सही नै रहेको निष्कर्ष निकालेको छ।
बुधबार सिंहदरबारमा बसेको कार्यदलको बैठकले सरकारलाई एकपटक सचेत गराउँदै भविष्यमा अध्यादेशबाट राज्य सञ्चालन गर्ने मनसाय नबनाउन सुझाव दिने र अहिलेको सन्दर्भमा सरकारसँग छलफल गर्न तयार रहेको बताइएको छ।
जसपा नेपालका कतिपय नेताहरूले संसदमा पेश हुन लागेको अध्यादेश आफ्नो पार्टीले समर्थन गर्न लागेको भन्दै आपत्ति जनाएका छन्। उनीहरूले अध्यक्ष यादवलाई सरकारमा जाने ‘सपना नदेख्न’समेत आग्रह गरेका छन्।
अध्यादेशको विरोध गर्ने समूहका एक नेताकाअनुसार अध्यक्ष यादवसहित केही सांसदहरूले ‘मन्त्री’को लोभमा प्रधानमन्त्री ओलीको अध्यादेशले देश चलाउने गलत शैलीलाई साथ खोजेको आरोप लगाएका छन्।
तर, जसपा नेपालले ती नेताहरूको भनाइ अस्विकार गर्दै बिहीबार बस्ने संसद बैठकअघि मात्रै अध्यादेशको समर्थन गर्ने कि नगर्ने भनेर निर्णय लिने दाबी गरेको छ।
