काठमाडौं । अमेरिकी राष्ट्रपति बन्न लागेका डोनाल्ड ट्रम्पले तुलसी गबार्डलाई राष्ट्रिय गुप्तचर विभागको निर्देशकमा नियुक्त गरेका छन् । त्यसयता सामाजिक सञ्जालमा विभिन्न प्रतिक्रिया आइरहेका छन् । तुलसी गबार्डको टर्कीका राष्ट्रपति रेसेप तैयप एर्दोगानप्रतिको अडान सबैभन्दा चर्चामा छ ।
टर्की नेटोको सदस्य राष्ट्र हो तर तुलसी गबार्ड रेसेप तैयप एर्दोगानको मुखर आलोचक हुन्। अब एक्समा प्रयोगकर्ताहरूले एर्दोगानको बारेमा गबार्डको पुरानो कथनहरू पुन: पोस्ट गर्दैछन्।
तुलसी गबार्डले आफ्नो पुरानो ‘एक्स’ पोस्टमा एर्दोगानलाई आइएसआइएस र अलकायदालाई सहयोग गरेको आरोप लगाएकी थिइन्।
आफूलाई पत्रकार भनी वर्णन गर्ने एक्स प्रयोगकर्ता रागीप साइलुले गबार्डको नियुक्तिको खिल्ली उडाउँदै लेखे , “टर्कीको लागि अर्को खुसीको खबर। ट्रम्पले तुलसी गबार्डलाई राष्ट्रिय खुफिया निर्देशकमा नियुक्त गरेका छन्। “उनलाई विश्वास छ कि एर्दोगानले आइएसआइएसलाई समर्थन गर्दछन् ।”
पेशाले आफूलाई अर्थशास्त्री बताउने ह्यारिस समारासले गबार्डको भिडियो शेयर गर्दै लेखेका छन् , ‘न टर्की न एर्दोगान अमेरिकाका साथी हुन् ।’
तुलसी गबार्डले २०२० मा नै भनेकी थिइन्, “धेरै वर्षदेखि पर्दा पछाडि आइएसआईएस र अलकायदाका आतंकवादीहरूलाई समर्थन गर्दै आएका एर्दोगान अमेरिकाको मित्र होइनन्। उनी संसारको सबैभन्दा खतरनाक तानाशाह हुन्।”
पत्रकार जोइस कारमले दावी गरे – गबार्ड बसर अल-असद र भ्लादिमिर पुटिनको निकट छिन्, इजरायलको समर्थन गर्छिन्, एर्दोगानको विरुद्ध छिन्, साउदी अरेबियाको आलोचना गर्छिन् र प्यालेस्टाइनी प्रदर्शनकारीहरूलाई हमासको कठपुतली मान्छिन्।
“म तुलसी गबार्डलाई माया गर्छु,” उद्यमी मारियोस कारात्जियासले आफ्नो इन्स्टाग्राम खातामा पोस्टमा लेखे । उनी देशभक्त, साहसी छिन् र विश्व, विशेष गरी एर्दोगानबारे स्पष्ट धारणा राख्छिन्।
