विजय सिंह
सिरहा, २९ कात्तिक – सिरहाको औरही गाउँपालिका—५ की राधादेवी दासले गत सोमबार बर्धमान अस्पताल, गोलबजारमा शल्यक्रिया मार्फत नवजात शिशुलाई जन्म दिनुभएको थियो। जन्मिएको नवजात शिशुको तौल कम र अवस्था कमजोर देखिएकाले उपचारमा लैजाँदै गर्दा असमयमै निधन भएको हो।
बर्धमान अस्पतालका सञ्चालक डा. तेज शंकर यादवले जानकारी दिए अनुसार, प्रादेशिक अस्पताल सिरहाबाट गम्भीर अवस्थामा रेफर भएर अस्पताल आएकी राधादेवीलाई सुत्केरी व्यथा सुरु भएको थियो। “बच्चा उल्टो अवस्थामा रहेकाले आमा र शिशुको ज्यान जोखिममा थियो,” डा. यादवले बताउनुभयो, “त्यसैले बिरामीका परिवारलाई सबै कुरा बुझाएर परिवारको सहमतिपछि शल्यक्रिया गरियो। शल्यक्रियामार्फत आमालाई सफलतापूर्वक बचाउन सकियो तर बच्चाको तौल कम भएको कारण थप उपचारको आवश्यकता देखियो।”
अस्पताल प्रशासनका अनुसार शिशुलाई प्राइमरी केयरको उपचार थालिएको थियो तर भेन्टिलेटर नभएको कारणले नजिकमा रहेको अस्पताल छिटोभन्दा छिटो लैजान सुझाव दिएको थियो। शिशुलाई अन्य अस्पताल लैजाने क्रममा बाटोमै मृत्यु भएको जानकारी प्राप्त भएको छ।
शिशुको मृत्युपछि परिवारमा शोकको वातावरण रहेको भए पनि, राधादेवीकी सासू जलेश्वरी दासले बर्धमान अस्पतालको सेवामा सन्तुष्टि व्यक्त गर्नुभएको छ। उहाँले अस्पतालले आमा र बच्चालाई बचाउन हरसम्भव प्रयास गरेको बताउँदै थप अनुसन्धानमा सहयोग गर्ने कुरा व्यक्त गर्नुभयो। “हामी अस्पतालको सेवाबाट सन्तुष्ट छौँ, यहाँका चिकित्सकले आमा र बच्चाको ज्यान बचाउन धेरै प्रयास गर्नुभयो,” उहाँले बताउनुभयो।
यस घटनामा राधादेवीको माइतीपक्षले शिशुको मृत्युप्रति संवेदनशीलता व्यक्त गर्दै प्रहरीमा उजुरी दिएपछि प्रहरीले आवश्यक अनुसन्धान थालिसकेको छ। अनुसन्धानका क्रममा मृतक शिशुको शव चिहानबाट निकालेर पोष्टमार्टमका लागि प्रादेशिक अस्पताल लहान पठाइएको छ।
बर्धमान अस्पतालले भने घरायसी द्वन्द्वका कारण अस्पतालमाथि अनावश्यक आक्षेप नलगाउन आग्रह गरेको छ। अस्पतालका अनुसार, राधादेवीका श्रीमान् चन्दन दास वैदेशिक रोजगारका सिलसिलामा भारतमा रहेका छन्, र अस्पतालले आफ्नो तर्फबाट कुनै कमी नगरेको स्पष्ट पारिएको छ।
