सिरहा जिल्लाको सुखिपुर नगरपालिका–१० स्थित जनता माध्यमिक विद्यालय, दहिपौड़ीको प्राङ्गणमा लागुऔषधविरुद्धको सन्देशसहितको जिल्ला स्तरीय क्रिकेट प्रतियोगिता सुरु भएको छ। यो प्रतियोगिता पद्मोदय फाउन्डेशनको सहयोगमा श्री रामजानकी स्पोर्ट्स क्लबद्वारा आयोजित गरिएको हो, जसले खेलकुदमार्फत युवाहरूलाई लागुऔषध तथा कुलतविरुद्ध सचेत गराउन लक्ष्य राखेको छ।
प्रतियोगिताको उद्घाटन कार्तिक ११ गते पद्मोदय फाउन्डेशनका अध्यक्ष दिपेन्द्र महतोले गरे। आठ टिमको सहभागिता रहेको यो प्रतियोगिताको फाइनल खेल कार्तिक २१ गते हुनेछ। समापन तथा पुरस्कार वितरणका लागि समाजसेवी अशोक खड्काले उपस्थित हुने आयोजकले जानकारी दिएका छन्।
युवाहरूका लागि खेलकुदको महत्व
युवाहरूलाई खेलकुदमा सक्रिय गराउनु अत्यन्तै आवश्यक छ, किनभने खेलकुदले उनीहरूको शारीरिक र मानसिक स्वास्थ्यमा सकारात्मक प्रभाव पार्दछ। खेलकुदले युवाहरूमा अनुशासन, आत्मविश्वास, सहकार्य र नेतृत्व क्षमताको विकास गर्छ। यसले लागुऔषधको दुव्र्यसनजस्ता कुलतबाट टाढा रहन सहयोग गर्दछ। खेलकुदले तनाव व्यवस्थापन, सहिष्णुता र सकारात्मक सोचको विकास गराउँछ, जसले गर्दा युवाहरू समाजप्रति उत्तरदायी बन्दै जान्छन्। साथै, स्थानीय स्तरमा यसरी आयोजित खेलकुद प्रतियोगिताले समुदायमा एकता र समर्पणको भावना जगाउँछ।
