काठमाडौं : बूढीगण्डकी जलविद्युत् आयोजनामा भएको विवादबारे नेपाल कम्युनिष्ट पार्टी नेकपाले लिखित धारणा सार्वजनिक गरेको छ। प्रवक्ता नारायणकाजी श्रेष्ठले बुधबार विज्ञप्ती जारी गर्दै जनता समाजवादीका वरिष्ठ नेता तथा पूर्व प्रधानमन्त्री बाबुराम भट्टराईले लगाएको आरोप पुष्टि गर्न चुनौती दिएका छन्।
नेता भट्टराईले गत बिहीबार गोरखामा एक कार्यक्रममा सार्वजनिक रुपमै बूढीगण्डकी जलविद्युत आयोजनामा नौ अर्ब भ्रष्टाचार भएको आरोप लगाएका थिए। उनले नेपाल कम्युनिष्ट पार्टी (नेकपा) का अध्यक्षद्वय केपी शर्मा ओली र पुष्पकमल दाहाल प्रचण्ड तथा नेपाली कांग्रेसका सभापति शेरबहादुर देउवाले मिलेर बूढीगण्डकीमा नौ अर्बको भ्रष्टाचार गरेको प्रमाण आफूसँग रहेको दाबी गरेका थिए।
बूढीगण्डकी परियोजनामा अर्बौ रकम घुस लिएको भनी सार्वजनिक रुपमा प्रकट गरेको अभिव्यक्ति बिलकुल आधारहीन, झूट, गलत, कपोकल्पित एवं दुरासयपूर्ण रहेकाले नेपाल कम्युनिष्ट पार्टी नेकपा त्यसलाई खारेज गर्दै घोर भत्सर्ना गर्दछ’, श्रेष्ठले भनेका छन्, ‘हामी त्यससँग सम्बन्धित तथाकथित कुनै प्रमाण भए सार्वजनिक रुपमा र राज्यको सम्बन्धित आधिकारिक निकायमा पेश गर्न चुनौती दिन्छौं ।
उनले बाबुरामको त्यस अभिव्यक्तिलाई भ्रम भनेका छन्। ‘यद्यपि त्यस प्रकारको कृत्रिम आरोपको तथाकथित प्रमाणको हौवा भ्रमको खेती मात्र हो भन्ने स्पष्ट नै छ’, उनले भनेका छन्, ‘तसर्थ राज्यको गरिमामय उच्च पद सम्हालिसकेका व्यक्तिबाट प्रचारित यसप्रकारको आपत्तिजनक एवम् गैरजिम्मेवार अभिव्यक्तिका निम्ति सार्वजनिक क्षमायाचना हुनुपर्दछ।
यसअघि प्रमुख प्रतिपक्षी नेपाली कांग्रेसले पनि सभापति देउवामाथि लगाएको आरोप प्रमाणित गर्न आइतबार बाबुरामलाई चुनौती दिइसकेको छ।
thahakhabar