राजविराज । राजविराजस्थित भेटनरी अस्पताल तथा पशु सेवा विज्ञ केन्द्रले ठूलो बदमासी गरेको पाइएको छ । श्रम गर्नेको पारिश्रमिक र किसानले गरेको कामको समेत भुक्तानी नदिएको पाइएको हो ।
पारिश्रमिक नदिएको भन्दै पशुलाई भ्याक्सिन लगाउनेहरुले आईतबारदेखि शुरु गरेको आन्दोलनमा अब भुक्तानी नपाएका किसान पनि समाहित भएका छन् । सोमबार दुबै पक्ष संयुक्त रुपमा आन्दोलन गरेका छन् । उनीहरुले सोमबार बिहान ११ देखि दिउँसो २ बजेसम्म भेटेनरी कार्यालयमा धर्ना दिएका छन् । भुक्तानी नपाएसम्म आन्दोलन जारी रहने उनीहरुको भनाई छ ।
बिभिन्न किसान समूह, कृषि सहकारी, नीजि फर्मका किसान मार्फत् भेटेनरी कार्यालय मार्फत् बिभिन्न योजना संचालन गरिएको थियो । हरुवा चरुवा वर्गको उत्थानका लागि बाख्रा बितरण कार्यक्रम, बाख्रा प्रवद्र्धन कार्यक्रम, भैंसी प्रवद्र्धन, घाँस श्रोत केन्द्र स्थापनासहितको काम जिल्लाको बिभिन्न ठाउँमा भएपनि भुक्तानी हुन सकेको छैन् ।
काम सकाएर प्रगति विवरण बुझाउँदा समेत कार्यालयले भुक्तानी नदिएको काम गरेकामध्येका मनोज मेहताले जानकारी दिए ।
यस्तै, सप्तरीको १८ वटै पालिकामा गत आ.ब. २०८०/८१ मा पशुलाई बिभिन्न भ्याक्सिन लगाउने काममा खटिएकाले अहिलेसम्म पारिश्रमिक पाउन सकेका छैनन् ।
गत आ.ब.मा सप्तरीका ४८ जना जेटी, ग्रामिण पशु स्वास्थ्य कार्यकर्तासहितका भ्याक्सिनेटरले सबै पालिकाका पशुलाई भ्याक्सिन लगाएका थिए । गाई, भैंसीलाई खारेत रोगबिरुद्धको, लम्पी स्कीनबिरुद्धको तथा भ्यागुते/चर्चरे रोगको र खसी÷बाख्रा÷बोकालाई पीपीआर भ्याक्सिन लगाएका थिए ।
यो भ्याक्सिन प्रदेश सरकारले भेटेनरी कार्यालयलाई पठाइदिएको थियो । भ्याक्सिन लगाउनेहरु प्रतिस्पर्धाको आधारमा छनौट गरिएका थिए । भ्याक्सिन लगाउनेहरुको पारिश्रमिक प्रदेश सरकारले भेटेनरी कार्यालयलाई पठाइदिएको थियो ।
आफूहरुले जिल्लाभरिका पशुलाई भ्याक्सिन लगाएर जेठको शुरु हप्तासम्मै प्रगति विवरण पेश गरेपनि पारिश्रमिक वापतको भुक्तानी नदिएको संघर्ष समितिका संयोजक यादवले बताए ।
छिन्नमस्ता गाउँपालिकामा भ्याक्सिन लगाएका मनोज यादवले यो पालिकाका मात्रै रु १ लाख ५ हजार पारिश्रमिक लिन बाँकी रहेको बताए ।
उनीहरुका अनुसार जिल्लाभरि लगाइएको भ्याक्सिन वापतको रु २० लाखभन्दा बढी भुक्तानी लिन बाँकी छ ।
यस सम्बन्धमा भेटेनरी कार्यालयका प्रमुख संग सम्पर्क गर्न खोज्दा हुन सकेन् ।
