परियोजना स्वीकृत र व्यवस्थापन गर्न समाजकल्याण परिषद्लाई निर्देशन

46

काठमाडौँ : प्रतिनिधिसभा अन्तर्गतको महिला तथा सामाजिक समितिले राष्ट्रिय प्राथमिकताको आधारमा क्षेत्रगत सन्तुलन कायम गरी परियोजना स्वीकृत र व्यवस्थापन गर्न समाजकल्याण परिषद्लाई निर्देशन दिएको छ ।
सिंहदरबारमा सोमबार बसेको समिति बैठकले परिषदबाट स्वीकृत अधिकांश परियोजनाहरूको राष्ट्रिय प्राथमिकताका आधारमा छनोट नभएको भन्दै राष्ट्रिय प्राथमिकताको आधारमा क्षेत्रगत सन्तुलन कायम गरी परियोजना स्वीकृत र व्यवस्थापन गर्न परिषद्लाई निर्देशन दिएको हो । बैठकले स्वीकृत परियोजनाको समय सीमासहितको स्पष्ट कार्ययोजना कार्यान्वयन गर्नुपर्नेमा जोड दिएको छ । त्यस्तै बैठकले अहिलेसम्म विभिन्न गैरसकारी संस्थाहरुको परियोजना सञ्चलनका लागि स्वीकृत भएको बजेटको विवरण उपलब्ध पनि निर्देशन दिइएको समिति सभापति निरुदेवी पालले जानकारी दिनुभयो । बैठकले नविकरण नभएका संस्थालाई खारेज नगर्दा परिषदको अवस्था, दूरदृष्टि र देशको आवश्यकताकाको समीक्षा गर्ने प्रवृत्ति स्पष्ट देखिएको सो विषयमा समेत स्पष्ट धारणासहित कार्य सम्पादन गर्न पनि निर्देशन दिइएको समिति सभापति पालले बताउनुभयो ।

बैठकमा परिषद्का उपाध्यक्ष डा पद्म प्रसाद खतिवडाले गैरसरकारी सङ्घले पेस गर्ने परियोजनाहरुको अध्ययन गरेर मात्रै अनुमति दिइने बताउनुभयो । सांसदहरुले गैरसरकारी संस्थाहरु नियमनको दायरामा ल्याउनुपर्ने अहिलेको आवश्यकता रहेको बताएका थिए ।