धनुषा : प्रदेश २ का भूमि व्यवस्था तथा सहकारी मन्त्रालयमा सरुवा भएर आएकी सचिव सम्झना काफ्लेलाई हाजिर हुन नदिएको घटनाबारे छानबिन गर्न समिति गठन भएको छ। हाजिर हुन मन्त्रालय पुगेकी काफ्लेलाई दुर्व्यवहारसम्बन्धी घटनाको छानबिन गर्न समिति गठन भएको हो।
प्रदेश २ का कृषि राज्यमन्त्री योगेन्द्रराय यादवको संयोजकत्वमा गठित समितिमा दुईजना निर्देशक रतनकुमार झा र जागेश्वर यादव सदस्य छन्। समितिले सचिब काफ्लेमाथि दुव्र्यवहार गर्ने बाहिरबाट आएका मानिसहरूको पहिचान गर्ने बताइएको छ।
समितिका संयोजक कृषि राज्यमन्त्री यादवले सचिव काफ्लेमाथि कुनै दुव्र्यवहार नभएको दाबी गरेका छन्। काफ्ले मन्त्रालयमा पुग्दा होहल्ला गर्ने व्यक्ति को थिए भन्ने जिज्ञासामा राज्यमन्त्री यादवले ‘यो छानबिनको विषय रहेको’ बताए।
‘अहिलेको विवाद व्यक्तिगतभन्दा नीतिगत हो, संघीय सरकारले महिनै पिच्छे सचिव सरुवा गर्दा कामकाज प्रभावित भएको छ,’ आयोमेलसँग कुरा गर्दै उनले भने,‘हामीले संघीय सरकारको बर्चस्वादी चरित्रको विरोध गरेका हौं।’
संघीय सरकारले सरुवा गरेर पठाएको सचिव काफ्लेले मुख्यमन्त्री, मन्त्री र आफूसँग समेत समन्वय नगरी सोझै कार्यालयमा हाजिर हुन पुगेको उनको भनाइ छ।
‘मुख्यमन्त्रीज्यू हुनुहुन्छ, मन्त्रीज्यू हुनुहुन्छ, म राज्यमन्त्री छु, उहाँ कसैसँग समन्वय गर्नु भएन,’ उनले भने,‘सरुवा भएर आएपछि समन्वय गर्नु पर्दथ्यो, सोझै कार्यालयमा हाजिर हुन पुग्नु भयो।’ तपाईंहरूलाई बाइपास गरेकोले अवरोध गरिएको हो भन्ने प्रश्नमा राज्यमन्त्री यादवले भने,‘त्यसो केहीपनि होइन, विधि र प्रक्रिया सबैले पूरा गर्नुपर्ने हुन्छ, हाम्रो भनाइ यति हो।’
सचिव काफ्लेलाई हाजिर हुनबाट कसैले नरोकेको बताउँदै राज्यमन्त्री यादवले अहिलेको लडाइँ सांकेतिकमात्र रहेको बताए।
पशु सेवा विभागबाट प्रदेश २ को मन्त्रालयमा सरुवा भएर आएकी काफ्ले बुधबार हाजिर हुन मन्त्रालय पुगेकी थिइन्। तर, कृषिमन्त्री शैलेन्द्र साहले बाहिरका व्यक्तिहरू बोलाएर उनलाई हाजिर हुनबाट रोकेका थिए।
सचिव काफ्लेलाई हाजिर हुननदिन मन्त्री साहका स्वकीय सचिव नवनित झाको नेतृत्वमा गएका युवाहरूको एक समूहले सचिवको कार्यकक्षमा ताल्चा लगएका थिए। मन्त्रालय पुगेका बाहिरी मानिसको पहिचान लुकाउन सीसीटीभी क्यामेरापनि बन्द गरिएको थियो।aayomail
