काठमाडौं, पुस । प्रधानमन्त्री पुष्पकमल दाहाल ‘प्रचण्ड’ले सोमबार नेपाल सरकारका सचिवहरुसँग छलफल गरेका छन् । प्रधानमन्त्री तथा मन्त्रिपरिषदको कार्यालय सिंहदरबारमा भएको छलफलमा सचिवहरुले आ–आफ्नो मन्त्रालयको वस्तुस्थितिबारे प्रधानमन्त्रीलाई रिपोर्टिङ गरेका थिए ।
छलफलमा गृह, अर्थ, शिक्षा, परराष्ट्र, भौतिक पूर्वाधार, संस्कृति तथा पर्यटन लगायतको मन्त्रालयका सचिवहरूले आफ्नो रिपोर्ट प्रस्तुत गरेका छन् ।
सबै सचिवहरूको रिपोर्ट सुनिसकेपछि आज प्रधानमन्त्रीले निर्देशनात्मक सम्बोधन गर्ने कार्यसूची रहेको छ । प्रधानमन्त्री दाहालले अहिले बिहान सिंहदरबारमा विभिन्न मन्त्रालयका सचिवहरुको बैठक बोलाएर ३० बुदे निर्देशन जारी गर्दैछन् ।
पछिल्लो समय सर्वसाधारणले नागरिकता, राहादानी, राष्ट्रिष्य परिचय बनाउन सास्ती भोग्न थालेको, थेग्ने नसक्ने गरी महँगी बढेको भन्दै जनताका समस्या समाधान गर्नु प्रधानमन्त्रीले सचिवहरुलाई निर्देशन जारी गर्न लागेका छन् । पुस १० मा प्रधानमन्त्रीमा नियुक्त भएका प्रचण्डले सुशासन र नागरिकलाई सरल र सहजरुपमा सेवा प्रदान गर्ने यसअघि नै घोषणा गरेका थिए ।
नागरिकलाई सेवा प्रदान गर्ने निकायमा भइरहेको बेथिति अन्त्य गर्ने घोषणा गरेका प्रधानमन्त्री दाहालले विशेष गरी राहदानी वितरण, सवारी चालक अनुमतिपत्रलगायत सेवाग्राहीको बढी भीडभाड हुने कार्यालयको कामलाई सरल र सहज बनाउन सचिवहरुलाई आज निर्देशन जारी गर्न लागेका हुन् ।
यसअघि पुस १३ गते उपप्रधान तथा गृहमन्त्री रवि लामिछानेले राहदानी विभागको अनुगमन गरेका थिए । मन्त्री लामिछाने अनुगमनमाका लागि विभागको कार्यलय त्रिपुरेश्वर पुग्नु र देशभरका प्रमुख जिल्ला अधिकारीसँगको छलफललाई स्टन्टवाजीको रुपमा हेर्न थालिएको छ ।
मन्त्री लामिछानेले यहि सोमबार जनताको गुनासो नआउने गरी काम गर्न प्रमुख जिल्ला अधिकारीहरुलाई दिएको निर्देशनलाई समेत स्टन्टको रुपमा हेरिन थालेको छ । उनले सोमबार भर्चुअल माध्यम मार्फत देशभरका प्रमुख जिल्ला अधिकारी र जिल्लाका सुरक्षा निकायका प्रमुखको बैठकमा नागरिकले शुसाशनको प्रत्याभूति महसुस हुनेगरी काम गर्न पनि निर्देशन दिएका थिए ।
