बाँके । बाँकेको नेपालगञ्ज उपमहानगरपालिका वडा नं. ४ गणेशपुरमा दिनदहाडै खुकुरी प्रहार घटनाका चार जना अपराधीलाई प्रहरीले नियन्त्रणमा लिएको छ ।
आइतबार करिब सवा २ बजेको समयमा युपि ३२ इयु ८६१६ नम्बरको भारतिय कारमा आएका विनय भण्डारी, नारायण डाँगी, प्रकाश रसाईली, तासे भन्ने प्रकाश थापा समेतका व्यक्तीहरुले नेपालगञ्जको गणेशपुरमा तीन जनालाई घाइते बनाएका थिए ।
भारतीय गाडीमा आएका उनीहरुले नेपालगञ्ज उप-महानगरपालिका वडा नं.१२ का अनुराग शाह, जानकी गाँउपालिका वडा नं.३ का उज्वल शाह र नेपालगञ्ज उप-महानगरपालिका वडा नं.४ का सुभम जंग शाहलाई खुकुरी प्रहार गरी घाइते बनाएका थिए । उनीहरु मध्ये लखनउमा उपचाररत अनुरागको अवस्था गम्भिर रहेको छ ।
जस पश्चात तत्काल जिल्ला प्रहरी कार्यालय बाँकेबाट प्रमुख प्रहरी उपरिक्षक सन्तोष सिंह राठौरको कमाण्डमा घटनास्थलमा पुगेको प्रहरी टोलीले घाइतेहरुलाई उपचारको लागि नेपालगञ्ज स्थित शिक्षण अस्पताल पठाइएको थियो ।
खुकुरी प्रहार गरी भागेका व्यक्तिहरुको खोजतलास गर्ने क्रममा उनीहरु बाँकेको डुडुवा गाँउपालिका वडा नं. ३ स्थित बनकट्टीबाट रामपुरुवा जाने कच्ची बाटोको दक्षिण तर्फ गहुँ लगाएको खेतमा घटनामा प्रयोग भएको खैरो रंगको कार प्रहरी फेला पारेको थियो । उक्त घटनामा संलग्न नेपालगञ्ज उप-महानगरपालिका वडा नं. १८ का २९ वर्षिय विनय भण्डारी, नेपालगञ्ज वडा नं. ६ का ३१ वर्षिय तासे भन्ने प्रकाश थापा, राप्तीसोनारी गाँउपालिका वडा नं. २ का ३१ वर्षिय नारायण डाँगी र वैजनाथ गाँउपालिका वडा नं. ५ का २९ वर्षिय प्रकाश रसाईली भन्ने तुल्सीराम सुनारलाई डुडुवा गाँउपालिका वडा नं.२ दासपुरुवाबाट नियन्त्रणमा लिइएको जिल्ला प्रहरीका सूचना अधिकारी राम प्रसाद घर्ती मगरले जानकारी दिए ।
उक्त घटनामा प्रयोग भएका २ थान खुकुरी नेपालगञ्ज वडा नं. ५ फुल्टेक्रा स्थित सडक नजिक बुट्यान झाँडीमा फेला पारेको र थप आवश्यक अनुसन्धान भइरहेको प्रहरीले जनाएको छ ।
अंग्रेजी नयाँ बर्षको साँझ नेपालगञ्जको कारकादौंमा रहेको स्टारलाईट होटलमा भएको झगडाकै कारण उग्ररुप लिएको प्रहरीको अनुसन्धानबाट खुल्न आएको छ । नयाँ बर्षको साँझ नेपालगञ्जको उक्त होटलमा खुकुरी प्रहारबाट घाइते भएका अनुराग शाह र घटनामा संलग्न रहेका तासे भन्ने प्रकाश थापाको समूह बीचमा वादविवाद र झगडा भई थापाको टाउकोमा चोट लागेको थियो । सोही घटनाको प्रतिशोध लिने उद्धेश्यले शाह समेत माथि योजना बनाई खुकुरी प्रहार भएको प्रहरीले जनाएको छ । दुबै समूह फरक-फरक राजनीतिक पृष्ठभूमी भएको प्रहरीले जनाएको छ ।
