काठमाडौं – गृह मन्त्री रवि लामिछानेले बिना अनुमति प्रहरीलाई बिना अनुमति नेता र राजदुत भेट्न प्रतिबन्ध लगाएका छन् । गृह मन्त्रालयको निर्देशन अनुसार अब विभागीय स्वीकृति लिएर मात्र सुरक्षा निकायका पदाधिकारीले कुटनीतिक नियोग, र राजनीतिक दलका नेतृत्वसँग भेटघाट गर्न पाउने छन् ।
संगठन प्रमुखले यो कार्य भए नभएको अनुगमन गर्न समेत मन्त्रालयले निर्देशन दिएको छ । बिना स्वीकृति भेटघाट गरेमा अनुशासनको कारवाही हुने मन्त्रालयले जनाएको छ ।
मन्त्रालयले आज जारी गरेको निर्देशनमा भनिएको छ ‘शान्ति सुरक्षा तथा अमनचयन कायम गर्ने प्रमुख जिम्मेवारी भएको सुरक्षा निकायका कतिपय पदाधिकारीहरू कर्तव्य पालनाको सिलसिलामा बाहेक पनि विभिन्न कुटनैतिक नियोग, राजनैतिक नेतृत्वसंग भेटघाट गर्ने गरेको बुझिन आएको हुँदा सुरक्षाकर्मी पदाधिकारीहरूले कुटनैतिक नियोग, विभिन्न राजनैतिक दलका कार्यालय वा नेतृत्वसंग भेटघाट गर्नुपर्ने भएमा स्पष्ट प्रयोजन साथ बिभागीय स्वीकृति लिएर मात्र गर्नु गराउनु हुन तथा सोको प्रभावकारी कार्यान्वयन तथा अनुगमन सम्बन्धित संगठन प्रमुखले मिलाउन हुन अनुरोध छ । साथै यस निर्देशन विपरित कार्य गरे गराएको पाइएमा प्रचलित कानून बमोजिम अनुशासन सम्बन्धी कारवाही हुने व्यहोरा सम्बन्धित सवैमा जानकारी गराईन्छ’।
