काठमाडौं – भारत सरकारको सहयोगअन्तर्गत निर्माण हुने तीन परियोजनाहरूमा समझदारी पत्रमा हस्ताक्षर भएको छ ।
भारत सरकारको अनुदान सहयोगमा नेपालमा शिक्षा, स्वास्थ्य सेवा तथा खानेपानी क्षेत्रसँग सम्बन्धित तीन वटा उच्च प्रभाव सामुदायिक विकास परियोजना अघि बढाउन भारतीय राजदूतावास र नेपाल सरकार संघीय मामिला तथा सामान्य प्रशासन मन्त्रालयबीच सोमबार समझदारी पत्रमा हस्ताक्षर सम्पन्न भएको हो ।
उदयपुर जिल्लामा श्री जनता बेलका माध्यमिक विद्यालयको विद्यालय भवन निर्माण, सोलुखुम्बु जिल्लाको मान्गोङ्गा थेन्चोक छोलिङ्ग ध्यान केन्द्रको निर्माण र धादिङमा लिस्नेखोला टिकासुङदाङ चेतझार्लाङ खानेपानी परियोजनाको निर्माण समेत गरी यी तीन परियोजनाहरू कूल अनुमानित नेरु. १० करोड १७ लाख लागतमा कार्यान्वयनमा ल्याइनेछ ।
उल्लिखित तीन परियोजनाहरूको निर्माणले स्थानीय समुदायका लागि राम्रो शिक्षा, स्वास्थ्य सुविधा तथा सुरक्षित खानेपानी उपलब्ध गराउनुका साथै नेपाली जनताको जीवनस्तरमा सुधार ल्याउने विश्वास भारतीय राजदूतावासले विज्ञप्तिमार्फत गरेको छ ।
