एजेन्सी । चीन र अरब देशका राष्ट्राध्यक्षहरुबीच भएको सम्झौताप्रति इरानले आपत्ती जनाएको छ । यसबारे आफ्नो औपचारिक प्रतिक्रिया दिन इरानको विदेश मन्त्रालयले चिनियाँ राजदूतलाई बोलाएको छ ।
चिनियाँ राष्ट्रपति सी जिनपिङ यसै हप्ता गल्फ कोअपरेसन काउन्सिल र अरब देशका राष्ट्राध्यक्षहरुसँग भेटवार्ता गर्न साउदी अरबको राजधानी रियाद गएका थिए । त्यहाँ उनले यूएई, बहराइन, ओमान, कतार र कुवेतका राष्ट्राध्यक्षहसँग भेटवार्ता गरेका थिए । साउदी अरब भ्रमणको अन्तिम दिन सयुक्त पत्र सार्वजनिक भएको थियो । त्यसमा अरब देशहरुप्रति अझ राम्रो साझेदारी र विवादलाई शान्तिपूर्ण रुपमा समाधानमा जोड दिइएको छ ।
यो सम्झौतामा एकअर्काको आन्तरिक नीति र घरेलु मुद्दाका विषयमा आलोचना नगर्ने पनि उनीहरूबीच सहमति भएको छ । चीन र साउदी अरब दुवै देश मानवअधिकारका विषयमा अन्तर्राष्ट्रिय समुदायमा आलोचित बन्ने गरेका छन् ।
गत जुन महिनामा अमेरिकाले चीनको पश्चिमी सिनजियाङ क्षेत्रमा उत्पादन हुने सबै सामानहरूमा प्रतिबन्ध लगाएको थियो । जहाँ २०१७ यता २० लाख अल्पसंख्यक उइघुर जाति लगायतका मानिसहरूलाई नजरबन्दमा राख्दै दुर्व्यवहार, जबरजस्ती श्रम र मृत्यु जस्ता यातना दिने गरेको बताइन्छ । जसकारण चीनमाथि अमेरिका लगायत देशहरूले मानवअधिकारको प्रश्न बारम्बार उठाउने गरेका छन् ।
अर्कोतर्फ साउदीका राजकुमार मोहम्मद बिन सलमानलाई वासिङटन पोस्टका अमेरिकी पत्रकार जमाल खसोग्गीको हत्यामा संलग्न रहेको आरोप लाग्ने गरेको छ । यद्यपि सलमानले उक्त आरोप अस्वीकार गर्दै आएका छन् ।
