काठमाडौं – प्रदेश र प्रतिनिधिसभा निर्वाचनका लागि उम्मेदवार मनोनयन दर्ताको तीन चार दिनअघि सत्तागठबन्धनको साथ छाडेर एमालेसँग घाँटी जोडेका जसपा अध्यक्ष उपेन्द्र यादव अहिले पछुताउन थालेका छन् ।
सप्तरी २ मा सिके राउतसँग पराजित भएपछि उनी सांसद बन्न सकेनन् । २०६४ यता यादव पहिलोृपल्ट संसद् बाहिर रहन पुगेका हुन् । एमालेसँग सहकार्य गरेकै कारण आफू मात्र पराजित हुनुपरेको मात्र नभई जसपा लज्जास्पद ढंगले पराजित भएको निष्कर्ष निकाल्दै उपेन्द्रले एमालेसँग सम्बन्ध तोडेको घोषणा गरेका छन् ।
आइतबार विराटनगर विमानस्थलमा सञ्चारकर्मीसँग कुराकानी गर्दै एमालेसँगको सहकार्य निर्वाचनसम्म मात्र रहेको भन्दै उनले अब जसपा स्वतन्त्र ढंगले अघि बढ्ने उदघोष गरे । स्रोतका अनुसार सम्मानजनक स्थान दिइए जसपा कांग्रेसको गठबन्धनमा सामेल हुने मनस्थितिमा छ ।
उसले संघ र मधेस प्रदेशमा राम्रो मन्त्रालय दाबी गरेको छ । उपेन्द्रले सहकार्य तोडेको घोषणा गरेपछि प्रदेश १ मा आफ्नो नेतृत्वमा सरकार बनाउने एमालेको सपनामा तुषरापात लागेको छ । प्रदेश १ मा एमाले पहिलो दल बनेको छ ।
उसले प्रत्यक्षतर्फ २५ सिट र समानुपातिकमा १५ गरी ४० सिट जितेको छ । सरकार बनाउन ४७ सांसद चाहिन्छ । एमाले गठबन्धनमा रहेको राप्रपासँग ६ सिट छ । जसपाले समानुपातिकमा एक पाउँदा एमालेको बहुमत पुग्थ्यो ।
तर जसपा एमाले गठबन्धनमा नबस्ने भएपछि त्यहाँ पनि सत्तागठबन्धनकै सरकार बन्ने देखिएको छ । प्रदेश १ मा नेपाली कांग्रेसले प्रत्यक्षमा १७ र समानुपातिकमा १२ गरी २९ सिट पाएकाले यदि एमालेले सरकार बनाउन नसके कांग्रेसकै नेतृत्वमा सरकार बन्ने निश्चित छ ।
एमालेबाट हिक्मत कार्की, तिलकुमार मियाङ्बो मुख्यमन्त्रीका दाबेदार छन् । कांग्रेसबाट केदार कार्की, अमृत अर्याललगायत चर्चामा छन् । प्रदेश १ मा कांग्रेसले गुरुराज घिमिरेलाई मुख्यमन्त्री बनाउन चाहेको थियो । तर, घिमिरे एक हजार मतान्तरमा पराजित भएकाले त्यो सम्भावना सकिएको छ ।
