काठमाडौं- कञ्चनपुर-२ मा नेपाली कांग्रेसका प्रभावशाली नेता एनपी साउदसँग नेकपा एमालेका नरबहादुर धामी प्रतिस्पर्धामा छन्। २०७४ को निर्वाचनमा वाम गठबन्धनबाट चुनाव लडेका धामीले साउदलाई झिनो मतान्तरले पराजित गरेका थिए। तर, यसपटक भने माहोल फेरिएको छ।
अघिल्लो चुनावमा वाम गठबन्धनको साहरामा जितेका नरबहादुर धामीलाई यस पटक सत्तारुढ गठबन्धन हुँदा एनपी साउद भारी पर्ने भएका छन्। नेकपा एमाले संविधान र व्यवस्था समाप्त पार्न लागिरहँदा त्यसको मतियार बनेको, एमालेको आन्तरिक किचलो बल्झिँदै जानु, स्थानीय निर्वाचनको मतपरिणाम लगायतका कारण यसपटक धामीको पराजय निश्चितजस्तै बनेको छ।
२०५१ को मध्यावधि निर्वाचनमा तीन क्षेत्र कायम गरिएकामा तीन वटै क्षेत्र एमाललेले हात पारेको थियो। त्यतिबेला क्षेत्र–१ मा रामकुमार ज्ञवाली, २ मा भोजराज जोशी र ३ मा उर्बादत्त पन्त विजयी भएका थिए। धामी यसअघि २०७० मा भएको दोस्रो संविधानसभा निर्वाचनमा क्षेत्र–३ मा कांग्रेसका बहादुर थापासँग पराजित भएका थिए।
१ लाख ७ हजार मतदाता भएको क्षेत्र-२ बाट निवर्तमान सांसद धामीले आफ्नो कार्यकालमा क्षेत्र–२ का समस्या समाधानमा कुनै पहल गर्न सकेनन्। उल्टै संसद्मा निदाएको, मर्यादापालकको काँध चढेकोजस्ता दृश्यले उनी विवादित बनेका थिए।
क्षेत्र नम्बर २ मा स्थानीय तहको परिणामअनुसार सत्तागठबन्धन बलियो देखिन्छ। यो क्षेत्रमा बेदकोट नगरपालिका (८ नम्बरबाहेक), शुक्लाफाँटा र कृष्णपुर नगरपालिकासहित ३० वडा छन्। स्थानीय तहमध्ये बेदकोट र कृष्णपुर नगरपालिकामा कांग्रेसले मेयर–उपमेयर दुवै जितेको छ।
शुक्लाफाँटा नगरपालिकामा उपमेयर मात्रै कांग्रेसले जितेको छ भने मेयर एमालेले जितेको छ। यहाँ स्थानीय चुनावमा एमाले, कांग्रेस एक्लाएक्लै तथा माओवादी केन्द्र र एकीकृत समाजवादी तालमेल गरेर लडेका थिए।
क्षेत्र नम्बर २ अन्तर्गत पर्ने तीन स्थानीय तहमा कांग्रेसका प्रमुखका उम्मेदवार एक्लैले कूल २४ हजार ६७६ मत बटुलेका छन्। एकीकृत समाजवादीसँग तालमेल गरेको माओवादीसँग पनि १० हजार हाराहारी मत छ।
माओवादीको समर्थनमा बेदकोट नगरपालिकामा मेयरका उम्मेदवार एकीकृत समाजवादीका रामचन्द्र रेग्मीले ३ हजार ८९८ र शुक्लाफाँटामा एकीकृत समाजवादीको समर्थनमा उम्मेदवार बनेका माओवादीका नवराज ऐरले ५ हजार २२५ मत ल्याएका थिए।
यस्तै, एक्लै लडेको कृष्णपुर नगरपालिकामा माओवादीका उम्मेदवार जोगराज चौधरीले ८ हजार २०० र एकीकृत समाजवादीका सुरेन्द्र बहादुर बलले ६७५ मत ल्याएका थिए। समाजवादीका रेग्मी र बम अहिले एमालेमै फर्किएका छन्। एमालेसँग क्षेत्र नम्बर २ मा १७ हजार बढी मत छ। एमालेका प्रमुखका उम्मेदवारले तीनै स्थानीय तहमा १७ हजार ९८७ मत बटुलेका छन्।
३० वडामध्ये कांग्रेसले १५ वडा, माओवादीले ८, एमाले ६ र एकीकृत समाजवादीले १ वडामा अध्यक्ष जितेको छ।
कांग्रेसले २ नम्बर निर्वाचन क्षेत्रमा पर्ने बेदकोटका १, ३, ४, ५ र ७, शुक्लाफाँटाका ४, ५, ६, ९, १० र ११ तथा कृष्णपुर नगरपालिकाका १, ५, ८ र ९ वडा जितेको छ। माओवादीले बेदकोटको वडा नम्बर ६, १०, शुक्लाफाँटाको ३, ८ र कृष्णपुरको २, ३, ४, ६ जितेको छ। एमालेले बेदकोटको वडा नम्बर २, ९, शुक्लाफाँटाको १, २, ७ र कृष्णपुरको ७ जितेको छ। एकीकृत समाजवादीले शुक्लाफाँटा–१२ मा जितेको छ।
