मंसिर ४ गते हुने प्रतिनिधिसभा तथा प्रदेशसभाको निर्वाचनमा भाग लिएका गठबन्धनका शीर्ष नेताहरु अहिले आश्वासन बाँडनमा व्यस्त भएका छन् । पाँच दलीय गठबन्धनमा आबद्ध दलहरुले प्रदेशका राजधानीहरुमा आयोजना गरेको प्रदेश स्तरीय भेला र नेकपा एमाले गठबन्धनले विभिन्न चुनावी भेलामा मात्रै आश्वासन बाँड्ने गरेको देखिएको छ ।
पाँच दलीय गठबन्धनले शनिवार जनकपुरधाममा आयोजना गरेको मधेश प्रदेश स्तरीय भेलामा गठबन्धन जिते हरेक समस्या समाधान हुने गठबन्धन आबद्ध दलका शीर्ष नेताहरुले आश्वासन बाँडेका छन् । एकातिर सरकारको नेतृत्व गर्ने अर्कातिर समस्या समाधानमा विपक्षी दल बाधाअडचन पुर्याएको आरोप लगाउने गरेका छन् । भेलामा शीर्ष नेताहरुले मधेशको स्मस्या समाधानका निमित्त नेकपा एमालेका अध्यक्ष केपी शर्मा ओलीले अड्चन गरेको आरोप लगाएका थिए । हरेक नेताले ओलीलाई प्रतिगमनकारीको संज्ञा दिए । नागरिकता विधेयक प्रमाणीकरण नहुनुको दोष ओलीलाई नै दिए ।
प्रधानमन्त्री शेर बहादुर देउवाले पनि अन्य नेता जस्तै पाँच दलीय गठबन्धनको जित आवश्यक रहेको बताए । गठबन्धनका उम्मेदवारहरु जिते नागरिकता समस्या समाधान गर्न कुनै प्रकारको बाधा अड्चन न आउने उनले जिकिर गरे । ‘गठबन्धनका उम्मेदवारहरु जिते हरेक प्रकारको समस्या समाधान हुन्छ,’उनले भने–‘त्यसैले गठबन्धनलाई जिताएर सबै समस्या समाधान गर्नुपर्छ ।’ गठबन्धन जिते लगत्तै नागरिकता समस्या समाधान हुने उनले प्रतिबद्धता जनाए ।
नेकपा माओवादी केन्द्रका नेता पुष्प कमल दाहाल (प्रचण्ड)ले पनि मधेश विरोधी गठबन्धनलाई पराजित गरी दण्डित गर्नुपर्ने बताए । ‘निरंकुशता र अहंकारविरुद्ध एकत्रित हुन उनले आह्वान गरेका थिए । मधेशी जनताको अधिकार एमाले र केपी शर्मा ओलीले कुण्ठित गरेको छ,’उनले भने–‘त्यसकारण हामी एक ढिक्का भएका छौं । तपाईहरु पनि एकजुट हुनस् । नागरिकताको समस्या यो गठबन्धनले हल गर्छ ।’ नेकपा (एकीकृत समाजवादी) का अध्यक्ष माधव नेपालले पनि पाँच दलीय गठबन्धनको पक्षमा नेपाली जनता उभिनु पर्ने उल्लेख गरे ।
