धनुषा : प्रदेश २ मा बन्दाबन्दी तथा निषेधाज्ञाको अवधिमा सवारी दुर्घटना र दुर्घटनाबाट ज्यान गुमाउनेको संख्यामा कमि भएको छ । पूर्व–पश्चिम महेन्द्रराजमार्गमा पर्ने प्रदेश २ का आठै जिल्लामा सवारीको चाप निकै बढी हुन्छ तर पछिल्लो ६ महिनामा दुर्घटनामा कमि आएको हो ।
प्रदेश २ का मुख्य सहर वीरगञ्ज, जनकपुर र राजविराजमा समुदायस्तमै कोरोना भाइरसको संक्रमण फैलिएकोले स्थानीय स्तरमा प्रमुख जिल्ला अधिकारी एवं जिल्ला सुरक्षा समितिको निर्णय अनुसार लकडाउन तथा निषेधाज्ञा जारी हुँदै आएको छ ।
आर्थिक वर्ष ०७५÷७६ मा रौतहटमा सबैभन्दा बढी १ सय ८० जनाको सवारी दुर्घटना भएको थियो । भने सबैभन्दा बढी सिरहामा ८७ जनाको सवारी दुर्घटनामा परी ज्यान गुमाउनु परेको थियो । योसँगै प्रदेश २ मा जम्मा ९ सय १४ वटा सवारीदुर्घटना र ४ सय ९६ जनाको दुर्घटनाबाट मुत्यु भएको थियो ।
त्यसैगरी, आर्थिक वर्ष ०७६÷०७७ मा प्रदेश २ मा १ हजार ३ सय ४० वटा सवारीदुर्घटना भएको थियो । प्रदेशभरीमा जम्मा ४ सय २० जनाको दुर्घटनामा ज्यान गुमाउनु परेको थियो ।
पछिल्लो २ आर्थिक वर्षको तुलानामा विगत ६ महिनाको लकडाउन अवधिमा सवारीदुर्घटना र मृत्यु हुनेको संख्यामा कमि आएको छ । चैत ११ देखि भदौ २७ सम्ममा प्रदेश २ मा १ हजार ७९ वटा दुर्घटना मध्ये १ सय ४० जनाको मात्र मृत्यु भएको तथ्यांकमा उल्लेख छ ।
सबैभन्दा बढी सप्तरीमा २०८, सिरहामा ७०, धनुषामा १६८, महोत्तरीमा ११३, सर्लाहीमा १९१, रौतहटमा १६३, बारा १२३ र पर्सामा ४३ वटा दुर्घटना भएको छ भने सबैभन्दा बढी सिरहामा २९, सप्तरीमा १७, धनुषामा २०, महोत्तरीमा १६, सर्लाही र रौतहटमा १४÷१४, बारामा २५ र पर्सामा ५ जनाको मात्र दुर्घटनामा मृत्यु भएको प्रदेश २ ट्राफिक प्रहरी कार्यालय पथलैया, बाराका तथ्यांकमा उल्लेख छ ।
किन कम भयो दुर्घटना
सरकारले गएको चैत ११ देखि १ सय २० दिन सम्म कोरोना माहामारी रोकथाम तथा नियन्त्रणका लागि लकडाउन गर्यो । त्यस यता स्थानीय प्रशासन एवं सुरक्षा समितिको निर्णय बमोजिम जिल्लागत रुपमा लकडाउन तथा निषेधाज्ञा लागू हुन थाल्यो । जारी लकडाउन तथा निषेधाज्ञामा अत्यावश्यक स्वास्थ्य सामाग्रीको गाडी, खाद्यान्यको गाडी, तरकारीको गाडी र एम्बुलेन्स बाहेकका सबै सवारीसाधन बन्द गरेको कारण दुर्घटनामा कमि आएको प्रदेश २ ट्राफिक प्रहरी कार्यालय पथलैया, बाराका प्रहरी उपरीक्षक श्यामकुमार महतो बताउँछन् ।
पर्सा जिल्लाको सदरमुकाम वीरगञ्जमा पछिल्लो २ दिन देखि सर्त बमोजिम बजारमा सबै किसिमको पसल खुल्छन् । त्यस्तै जनकपुरमा जोरविजोर प्रणालीबाट गाडी चल्ने भएको छ । जिल्ला स्तरीय कोभिड १९ संकट व्यवस्थापन केन्द्रको सिफारिस र जिल्ला सुरक्षा समितिको आइतबारको निर्णय अनुसार किराना पस, फलफुल र तरकारी पसलहरु बिहान ११ बजेसम्म र बेलुका ५ बजेदेखि ८ बजेसम्म सञ्चालन गर्न पाइने निर्णय गरिएको छ भने निषेधित बाहेक अन्य पसलहरु ११ बजेदेखि साँझ ६ बजेसम्म सञ्चालन गर्न पाइने भएको छ ।
त्यस्तै, जिल्ला प्रशासन कार्याल सप्तरीले जिल्लागत रुपमा नभई राजविराज नगरपालिकामा मात्र लागू हुने गरि निषेधाज्ञा जारी गरेको छ ।
