राजविराज । सप्तरीको बलान बिहुल गाउँपालिकाको वडा भवन निर्माणमा भ्रष्टाचार भएको भन्दै अख्तियार दुरुपयोग अनुसन्धान आयोगले पालिकाको उपाध्यक्ष सहित ९ जना उपर विशेष अदालत काठमाण्डौंमा भ्रष्टाचार मुद्दा दायर गरेको छ ।
वाडा नम्बर–४ बेल्हीमा अधुरो वडा कार्यालय भवन बास्तबमा भए गरेको कार्यभन्दा नापी किताबमा बढी देखाई भुक्तानीको लागि कागजात पेश गर्ने उपभोक्ता समिति, प्राविधिक कर्मचारी तथा अनुगमन गर्ने एवं भुक्तानी प्रक्रियामा संलग्न व्यक्ति उपर मुद्दा दायर भएको हो ।
अख्तियारले उपाध्यक्ष रुवि गुप्ता कार्यपालिका सदस्य हरि प्रसाद मोची उपभोक्ता समितिका तत्कालीन अध्यक्ष सुशील कुमार यादव, तत्कालीन कोषाध्यक्ष रम्भादेवी यादव , तत्कालीन सचिव शिवशंकर मण्डल गाउँपालिकका तत्कालीन प्रमुख प्रशासकीय अधिकृत महेश कुमार यादव, तत्कालीन योजना शाखा प्रमुख रमेश मरीक यादव, तत्कालीन प्राविधिक शाखा प्रमुख सब–इन्जिनियर सन्तोष कुमार रजक र तत्कालीन सह–लेखापाल सुभाष चन्द्र लाल उपर मुद्दा दायर गरेको छ ।
आर्थिक वर्ष २०७५/०७६ को विनियोजित रकम बलान बिहुल गाँउपालिका वडा नं. ४ को अधुरो वडा कार्यालय भवन निर्माण कार्य सम्पन्न भई सेवा प्रवाह भईरहेको भएपनि वास्तविक कामभन्दा बढी काम देखाई भुक्तानी भएको देखिएकाले उक्त कार्यमा संलग्न बलान बिहुल गाउँपालिकाका तत्कालीन कर्मचरीहरुले फिल्डमा नभएको नगरेको कामको मूल्याङकन गरी गलत कार्यसम्पन्न प्रतिवेदन तयार गरी उपभोक्ता समितिले तयार गरेको झुठ्ठा बिल भरपाईलाई स्वीकार गरी अन्तिम बिल भुक्तानीको लागि टिप्पणी उठाई सदर गरी भुक्तानी दिएकाले उनिहरु उपर भ्रष्टाचार निवारण ऐन, २०५९ को दफा ८ (१) को देहाय (ग) र (ङ) बमोजीम मुद्दा दायर गरिएको हो । उनिहरु उपर ऐनको दफा १९(२) बमोजिम दश लाख पाँच हजार चार सय सन्तानब्बे रुपैयाँ उनन्चालीस पैसाको विगो कायम गरी मुद्दा दायर गरेको उख्तियारद्धारा जारी गरिएको विज्ञप्तीमा उल्लेख गरिएको छ ।
बलान विहुल गाउँपालिकाका उपाध्यक्ष गुप्ता र कार्यपालिका सदस्य मोचीले बदनियतपुर्बक भए गरेको कार्य लुकाईछिपाई नभए नगरेको कुरा देखाई गलत कार्यसम्पन्न अनुगमन गरेको र उपभोक्ता समितिले फिल्डमा वास्तविक रुपमा भएको कार्यभन्दा बढी मूल्याङ्कन गरी गराई कार्यसम्पन्न भयो भनी कार्य सम्झौता बिपरीत कार्य गरी भुक्तानी माग गरेको हुँदा उनिहरुमाथि पनि अख्तियारले भ्रष्टाचार मुदा दायर जनाएको छ ।
