धनुषा : प्रदेश २ का मुख्यमन्त्री लालबाबु राउतले कोरोना नियन्त्रणका लागि दिएको बजेट पनि जिल्ला प्रशासन कार्यालय र अस्पतालले खर्च गर्न नसक्नु दुर्भाग्य रहेको बताएको छ ।
बिहीवार कोरोना महामारी नियन्त्रण सम्बन्धमा सर्लाही र रौतहटका सरोकारवालासँग सृुझाव लिन सर्लाहीको हरिवनमा बिहीबार आयोजित कार्यक्रममा मुख्यमन्त्री राउतले कोरोना नियन्त्रणका लागि प्रदेश सरकारले आप्नै कुनै कसर नछोडेको दाबी गर्दै सम्बन्धित निकायले रकमै खर्च नगर्नु भनेको कस्तो दुर्भाग्य भने ।
प्रदेश सरकारले पटक पटक जिल्लामा रकम र स्वास्थ्य उपकरण तथा सामग्री पठाए पनि जिल्लास्थित जिम्मेवार व्यक्तिहरुले सदुपयोग गर्न सकेन भन्दै हामीले क्षमता अनुसार भ्याएसम्म कोरोना संक्रमण नियन्त्रणका लागि कुनै कसर बाँकी नराख्ने बताए ।
मुख्यमन्त्री राउतले बाराको कलैया अस्पतालमा पठाइएको ५ करोड, रौतहटको गौर अस्पतालमा पठाइएको अढाई करोड रकम खर्च हुन नसकी फिर्ता भएको जानकारी गराए । उनले भने, ‘यो रकमले ती अस्पतालहरुमा आईसीयू, सीसीयू लगायत उपकरण तयार गर्न सकिन्थ्यो, तर गर्न नसक्नु प्रदेश सरकारको गलती होइन ।
हालै जिल्लाहरुमा पठाइएको रकम कोरोना महामारी नियन्त्रणमा खर्च गर्न उनले निर्देशन समेत दिए । मुख्यमन्त्री राउतले कोरोना महामारीको यस संकटको घडीमा जनताको ज्यानको रक्षा नै प्रदेश सरकारको पहिलो प्राथमिकता रहेको बताए ।
मुख्यमन्त्री राउतले आठवटै जिल्लामा पीसीआर ल्याब सञ्चालनका लागि प्रक्रिया शुरु भइसकेको उल्लेख गर्दै रौतहटमा जडान भइसकेको र बाँकी जिल्लामा १५ दिनभित्र प्रयोगशाला तयार गरिने जानकारी समेत दिए ।
कार्यक्रममा समाजिक विकास मन्त्री नवलकिशोर साहले स्वास्थ्य सामग्रीको कुनै अभाव हुन नदिने प्रतिवद्धता जनाउंदै यसमा सबैको सहयोग आवश्यक रहेको बताए ।
सो कार्यक्रममा पूर्व स्वास्थ्य राज्य मन्त्री एवं विज्ञ समूहका सदस्य डा. सुरेन्द्र यादव, मुख्यन्यायाधिवक्ता दिपेन्द्र झा, सुरक्षा निकायका प्रदेश प्रमुख हरु, गौर, मलंगवा र हरिवनका मेयरहरु, रौतहट र सर्लाहीका प्रमुख जिल्ला अधिकारी, प्रहरी प्रमुखहरु गौर र मलंगवा अस्पतालका प्रमुखहरु सहितको उपस्थिति रहेको थियो । lokpukar
