जोमसोम : नेपालका लागि युरोपियन युनियनकी राजदूत नोना डिप्रेजसहितको टोलीलाई सुरक्षाकर्मीले कोरला नाका जान रोकेका छन्। कोरला नाका जान लागेको राजदूतसहितको टोलीलाई नेचुङ भन्सारमा रहेका सुरक्षाकर्मीले रोक लगाएका हुन्।
मुस्ताङको उत्तरी कोरला नाकाबाट यता करिब १० किमी दक्षिणमा सशस्त्र प्रहरीको बिओपी स्थापना भइसकेको र सीमा प्रहरीका चौकीका सुरक्षाकर्मीले कडा निगरानीका साथ चेकजाँच गर्ने गरिएको छ। राजदूत डिप्रेजसहितको टोलीले सीमा सुरक्षाका लागि खटिएको बिओपि र नेपाल प्रहरीको टोलीले कोरला नाका जान रोक लगाएको थियो। जिल्ला प्रहरी कार्यालय मुस्ताङले अध्यागन विभागबाट परमिट काटेर उपल्लो मुस्ताङ जाने जुनसुकै विदेशीलाई कोरलानाका जान सरकारले अनुमति प्रदान नगरेको बताएको छ। नेचुङ पुगेको युरोपेयन टोली सो स्थानबाट अक्टुबर १ तारिखमा जोमसोम फर्किएको थियो।
पश्मिना क्षेत्रको सम्भावना, अध्ययन अनुगमन तथा स्थानीय निकाय र बहुसरोकारवाला निकायसँग परामर्श गर्ने उद्देश्यले मुस्ताङ आएकी राजदूत डिप्रेज काम सकेर कोरलानाका जाने क्रममा लोमान्थाङ—२ छोसेरबाट फर्किन बाध्य भएकी हुन्। गत असोज ११ गते सवारी साधन चढेर मुस्ताङ आएकी युरोपियन युनियनकी राजदूत पहिलो दिन जोमसोमस्थित होटल ओम्स होम्समा बाँस बसेकी थिइन्। उनीसँगै युरोपियन युनियनका वरिष्ठ कार्यक्रम संयोजक मिम हमाल र ईन्टनेशनल ट्रेड सेन्टरका प्रतिनिधि बिदुर घिमिरे मुस्ताङ आएका थिए।
उनीहरुले दोस्रो दिन मुस्ताङका पत्रकारसँग पश्मिनाक्षेत्रमा भइरहेको कार्यक्रम र भावी योजनाका सम्बन्धमा छलफल तथा अन्तर्क्रिया गरेका थिए। सोही दिन टोलीले मुस्ताङ च्यांग्रा तथा पश्मिना कृषक संघ र स्थानीय महिला उद्यमीसँग अन्तर्क्रिया गरेका थिए।
यस्तै, तेस्रो दिनमा सो टोली उपल्लो मुस्ताङ प्रस्थान गरेको थियो। पश्मिना क्षेत्रको दिगो विकास तथा युरोपियन युनियन र साझेदारी संस्थाहरुबाट भइरहेको कार्यक्रमको अनुमगनका लागि उपल्लो मुस्ताङ पुगेको राजदूत डिप्रेजको टोलीले चौथोदिन लोघेकर दामोदरकुण्ड गापाको चराङमा नेपाल पश्मिना महासँगको समन्वयमा सुरु गरिएको पश्मिना संकलन तथा प्रशोधन केन्द्रको उद्घाटन गरेकी थिइन्। सोही दिन लोघेकर दामोदरकुण्ड र लोमान्थाङ गाउँपालिकाका जनप्रतिनिधिहरु छलफल तथा अन्तर्क्रिया गरेकी थिइन्।
केही वर्षअघि कोरला नाकामा खटिएका चिनिया सुरक्षा अधिकारीहरु विभिन्न बहाना बनाएर बिना अनुमति उपल्लो मुस्ताङको लोमान्थाङसम्म आएर फर्किने गर्थ्यो। पछिल्लो समय चीनले कोरला नाकामा सुरक्षा उपस्थित मजबुद बनाउँदै आइरहेको छ। उनीहरुले नाका आसपास अत्याधुनिक सीसी क्यामेरा जडान गरेका छन् ।
