काठमाडौं । नेपाली कांग्रेसका नेता प्रकाशमान सिंहले काम गर्न नसक्नेहरुको गुणगान नगाउन कार्यकर्ताहरुलाई अपिल गरेका छन् । आफ्नै समूहका नेता रामचन्द्र पौडेलको आलोचना गर्दै उनले यस्तो आह्वान गरेका हुन् ।
कांग्रेस काठमाडौं महानगरको अधिवेशन उद्घाटन गर्दै उनले वरिष्ठ नेता रामचन्द्र पौडेललगायतका नेताहरुले विश्राम लिनुपर्ने बताए । ‘१३औं महाधिवेशन पश्चात् उहाँहरुले अवसर त पाएकै हो नि । तर, क्रियाशील मिलाउन नसकेर समय सकिँदा पनि अधिवेशन गर्न सकेको छैन,’ उनले भने, ‘अनि किन गुणगान गाउने ?’
नेता सिंहले जनतासँग विश्वासको मत लिन जाने हो भने जनताले नेतृत्व परिवर्तन गरेर आउ भन्ने अवस्था आएको बताए ।
पार्टीको सिद्धान्त, आदर्श र लोकतन्त्रका लागि गरेको संघर्षले कांग्रेसलाई विश्व समुदायमा चिनारी दिएको भन्दै पार्टीको महत्व बुझ्नु आजको आवश्यक्ता भएको सिंहले बताए । तर, सिद्धान्तअनुरुप डेलिभेरी हुन नसकेको उनको भनाइ थियो ।
