लन्डन- आतंकवादी समूहको आश्रय स्थलको रुपमा पाकिस्तानले तालिबानी समूहले अफगानिस्तानमा गरेको सत्ता कब्जाको घटनालाई स्वागत गरेको छ ।
पाकिस्तानी प्रधानमन्त्री इमरान खानले तालिबानी समूहले अफगानिस्तानमा गरेको सत्ता कब्जालाई स्वागत गरेपछि बेलायतको निशानामा पाकिस्तान परेको हो ।
बेलायती सांसद ड्यानियल काउजिन्स्कीले बेलायती सरकारलाई पाकिस्तानलाई अन्तर्राष्ट्रिय सहायता पठाउने विषयमा गम्भीरतापूर्वक विचार गर्न आग्रह गरेका हुन् । पाकिस्तानी प्रधानमन्त्री खानले तालिबानी समूहले अफगानिस्तानको निर्वाचित सरकारलाई परास्त गर्दै सत्ता कब्जा गरेको घटनालाई स्वागत गरेपछि बेलायती सांसद्ले पाकिस्तानलाई उपलब्ध गराइने सहायतालाई रोक्न आग्रह गरेका हुन् ।
सांसदले अफगानिस्तानका विषयमा बेलायती संसदमा सुरु भएको आपतकालीन बहसको क्रममा हाउस अफ कमन्सलाई एक गम्भीर सन्देश दिएका हुन् । उनले अफगानिस्तानमा तालिबान शासनको समर्थनमा आवाज उठाउने देश पाकिस्तानलाई बेलायती करदाताहरुको रकम पाकिस्तानलाई उपलब्ध गराउने बेलायतको भूमिकामाथि प्रश्नसमेत उठाएका हुन् ।
अन्तर्राष्ट्रिय विकास विभागको आंकडा अनुसार बेलायतले २०१९ मा पाकिस्तानलाई ३०५ मिलियन अमेरिकी डलर सहायता रकम पठाएको थियो । जुन पाकिस्तानलाई कुनै विदेशी मुलुकले गराएको सहायता रकमको सबैभन्दा ठूलो हिस्सा भएको जनाइएको छ ।
सांसदले भने, “हामीले रुस र पाकिस्तानको भूमिकाको बारेमा प्रश्न सोध्नु पर्छ । उनीहरु तालिबानलाई समर्थन गरिरहेका छन् । त्यसैले त्यहाँ पाकिस्तान र उनको सुरक्षा बलको भूमिकाको बारेमा गम्भीर प्रश्नहरु छन् ।”
पाकिस्तानका प्रधानमन्त्री इमरान खानले तालिबानको समर्थनमा आवाज उठाउँदै अफगानी जनताले दासत्वको बन्धन तोडेको उल्लेख गरेका छन् । उनले युद्धग्रस्त राष्ट्रमा हिंसात्मक तरिकाले सत्ता कब्जा गरेको विषयलाई प्रशंसा गरेका छन् । यस विषयलाई लिएर अन्तर्राष्ट्रिय समुदायले चर्को आलोचना गरिरहेको छ । एजेन्सी
