काठमाडौं । प्रधानमन्त्री केपी शर्मा ओलीले लोकतन्त्र भनेको कानूनको राज भएको बताउनुभएको छ । अखिल नेपाल किसान महासंघको भेलालाई सम्बोधन गर्दै प्रधानमन्त्री ओलीले दाहाल–नेपाल समूहको नेकपालाई लक्षित गर्दै लोकतन्त्र कानूनको राज भएको बताउनुभएको हो ।
उहाँले नेकपा अध्यक्ष पुष्पकमल दाहालले निर्वाचन आयोग, सर्वोच्च अदालत लगायत जो कोहिलाई धम्की दिँदै हिँडेको भन्दै लोकतन्त्रमा कानून मान्नुपर्छ धम्की गर्दै हिँड्न पाइँदैन भन्नुभयो ।
उहाँले भन्नुभयो, ‘उहाँहरु धम्की गर्नुहुन्छ । कहिले अदालत कहिले सवोच्च त कहिले सरकारी कर्मचारी सिडियोलाई धम्की दिँदै हिँड्नुहुन्छ । यो त्यो जमना होइन जति बेला जसलाई पनि धम्की दिँदै हिँड्न पाइन्थ्यो । कानूनको पालना गर्नुहुन्न । लोकतन्त्र भनेको कानूनको राज हो धम्कीको होइन ।’
प्रधानमन्त्री ओलीले दाहाल–नेपाल समूहका कार्यकर्ता सकिएर अध्यक्ष दाहाल आफैँ आन्दोलन र बन्द गर्न सडकमा हिँडेको बताउनुभयो । उहाँले कार्यकर्ता जति सबै आफैँसँग भएपछि दाहाल आफैँ सडकमा जानुपरेको भन्दै व्यङ्ग्य गर्नुभयो ।
