काठमाडौं — पछिल्लो समय विभिन्न सामाजिक तथा सेवामूलक गतिविधिमा सक्रिय देखिएका अशोक कुमार खड्काले आफू कुनै पनि राजनीतिक दलको साधारण सदस्य समेत नरहेको स्पष्ट पारेका छन्।
नेको इन्सुरेन्सका प्रमुख कार्यकारी अधिकृत खड्काले सामाजिक सञ्जालमार्फत आफ्नो धारणा सार्वजनिक गर्दै समाजसेवा आफ्नो व्यक्तिगत प्रतिबद्धता भएको र यसलाई कुनै राजनीतिक दलसँग जोडेर व्याख्या नगर्न आग्रह गरेका हुन्।
बैंकिङ क्षेत्रबाट आफ्नो व्यावसायिक यात्रा सुरु गरेका खड्का आज सफल जलविद्युत व्यवसायी तथा सक्षम व्यवस्थापकका रूपमा परिचित छन्। व्यवस्थापन क्षमता, दूरदर्शी सोच र कार्यकौशलका कारण उनले छोटो समयमै नेको इन्सुरेन्सलाई नयाँ उचाइतर्फ अग्रसर गराएको सहकर्मीहरू बताउँछन्।
संस्थागत सुधार, सेवाको विस्तार तथा आधुनिक व्यवस्थापन शैली अपनाउँदै उनले कम्पनीलाई प्रतिस्पर्धी बजारमा सुदृढ बनाएको उल्लेख गरिन्छ। यही कारणले उनी व्यावसायिक क्षेत्रमै एक कुशल प्रशासकका रूपमा परिचित हुँदै आएका छन्।
पेशागत सफलतासँगै सामाजिक उत्तरदायित्वप्रति पनि उत्तिकै संवेदनशील रहेका खड्का पछिल्लो समय शिक्षा, स्वास्थ्य, विपन्न वर्गलाई सहयोग तथा विभिन्न सामाजिक कार्यक्रमहरूमा सक्रिय रूपमा सहभागी हुँदै आएका छन्।
सामाजिक गतिविधिमा उनको सक्रियता बढेसँगै कतिपयले उनको राजनीतिक आबद्धताबारे विभिन्न अड्कलबाजी गर्न थालेपछि उनले सामाजिक सञ्जालमार्फत स्पष्टिकरण दिएका हुन्।
खड्काले सामाजिक सञ्जालमा लेखेका छन्, “समाजसेवा मेरो व्यक्तिगत प्रतिबद्धता र सामाजिक कर्तव्य हो। म कुनै पनि राजनीतिक दलको साधारण सदस्य समेत होइन।”
उनको यस अभिव्यक्तिलाई सामाजिक सञ्जालमा धेरैले सकारात्मक रूपमा लिएका छन्। धेरैले उनको पेशागत सफलता, नेतृत्व क्षमता तथा समाजप्रतिको समर्पणको प्रशंसा गर्दै आगामी दिनमा पनि समाजसेवामा निरन्तर सक्रिय रहन र रास्ट्र निर्माणमा अगाडी बढ्न शुभकामना व्यक्त गरेका छन्।
