काठमाडौं । मध्यपूर्वका देशहरूमा रहेका अमेरिकी सेनाका बेसहरूलाई इरानले लक्षित गर्न थालेपछि यहाँका धेरै देशहरूको एयरस्पेस बन्द गरिएका छन्। एयरस्पेस असुरक्षित भएसँगै धेरै एयरलाइन्सले आफ्ना उडानहरू रद्द वा स्थगित गरेका छन् । क्षेत्रीय हवाई क्षेत्र बन्द र बढ्दो सुरक्षा संकटका कारण खाडीका प्रमुख विमान सेवाहरूले आफ्नो उडान स्थगित गरेका हुन्।
नेपाल एयरलाइन्सले दुबई र दोहा गन्तव्यतर्फका उडानहरू अर्को सूचना नआउन्जेलसम्म रद्द गरेको छ। दमाम गन्तव्यतर्फका उडानहरू पनि स्थगित गरिएको छ। एयरलाइन्सले यात्रुहरूलाई आधिकारिक वेबसाइट वा सामाजिक सञ्जालमार्फत अद्यावधिक जानकारी लिन आग्रह गरेको छ।
फ्लाइदुबइले आइतबार बिहान विज्ञप्ति जारी गर्दै २०२६ मार्च १, आइतबार दिउँसो ३ बजेसम्म दुबईमा हुने सबै उडान स्थगित गरिएको घोषणा गरेको छ। कम्पनीले प्रभावित यात्रुहरूको हेरचाहका लागि विशेष व्यवस्था गरिएको र यात्रु तथा चालक दलको सुरक्षा नै शीर्ष प्राथमिकता रहेको जनाएको छ।
इमिरेट्स एयरलाइन्सले पनि दुबईमा हुने सबै उडान अस्थायी रूपमा बन्द गरिएको जनाएको छ। यात्रुहरूले ७२ घण्टा भित्रको यात्रा पुनः बुक गर्न वा रकम फिर्ता लिन सक्ने व्यवस्था गरिएको छ। कम्पनीले यात्रुहरूलाई आफ्नो सम्पर्क विवरण अद्यावधिक गर्न र उडान स्थिति जाँच्न आग्रह गरेको छ।
एतिहाद एयरलाइन्सले अबुधाबीमा हुने सबै उडान २०२६ मार्च २, सोमबार बिहान २ बजेसम्म स्थगित गरिएको जनाएको छ। प्रभावित यात्रुहरूले मार्च १५ सम्म पुनः बुकिङ वा पूर्ण रकम फिर्ता लिन सक्ने व्यवस्था गरिएको छ। कम्पनीले उच्च संख्यामा फोन कलहरू प्राप्त भइरहेको भन्दै धैर्य देखाउन आग्रह गरेको छ।
एयर इण्डियाले पनि मार्च १ का लागि तय गरिएका दिल्ली–लन्डन, बर्मिङ्घम, एम्स्टर्डम, ज्युरिख, मिलान, भियना, कोपेनहेगन, फ्राङ्कफर्ट, मुम्बई–लन्डन र बेंगलुरु–लन्डन उडानहरू रद्द गरेको छ। कम्पनीले यात्रुहरूको सुरक्षा नै शीर्ष प्राथमिकता रहेको उल्लेख गर्दै प्रभावित यात्रुहरूलाई पुनः बुकिङ वा वैकल्पिक यात्रा व्यवस्थामा सहयोग गरिरहेको जनाएको छ।
कतार एयरवेजले कतारी हवाई क्षेत्र बन्द भएपछि दोहाबाट हुने सबै उडान अस्थायी रूपमा स्थगित गरेको छ। कम्पनीले कतार नागरिक उड्डयन प्राधिकरणले हवाई क्षेत्र पुनः खोल्ने घोषणा गरेपछि मात्र उडान पुनः सुरु हुने जनाएको छ।
